Cerpen Iban (Pengingat Lama Diati Selalu)

"Ulu Latong" Pengingat Lama Diati Selalu - Anembiak Latong Rebak Baru

Nyau ke puas duduk dunga-dunga nadai ga tentu pengawa, dia deh runding nyau terpawah, tekenang ke sejarah pengidup diri kelia lebuh ke agi diau di rumah panjai kami di menua ti dikumbai “Ulu Latong”. Arinya tadi bisi ga pengingin ati deka bekunsi ke pengingat ari kelia nyentuk ke diatu nengah cerpen ti diberi aku nama “Ulu Latong”, pengingat lama diati selalu.

Ulu latong tu rumah panjai ke pengambis ulu patik sungai Machan. Kira-kira sejam pejalai ngena perau undur ke pasar Machan. Batang pengawa kami serumah ditu endang sigi betangkal ke getah, bekebun lada enggau koko enda ditinggal mega ke bumai. Ti lebuh pagi-pagi rindu meda bala mensia ke nurun nangkal,nurun ke kebun enggau bisi nya nurun ke umai. Endang sigi udah jalai pengidup dirumah panjai cara ngiga belanja dikena bebeli ke pemakai, ngisi ruang bilik piak mega ke napi anak ti besekula.

Maianya umur aku baru manggai 4 taun lebih, tang laban ke manchal serta endang sigi anak rumah panjai nya alai regas amat ga enggau sida ke tuai agi umur segau-segau sebelah tanah, sebelah baruh rumah. Piak mega ti lebuh niang ine bisi pejalai ke bukai, aku endang sigi di bai indai nurun kekebun lada, tauka nangkal getah kami di sebiru. Lebuh maia ke rajin nadai ga maioh dalih, tembu lalu beradu enggau. Tang ti lebuh angin enda entu manah, nya iya ke nyau ulih ngupah enggau ke kebun. Laban bai ati ti deka enggau bala kaban ke serebak bemain nya alai enggai enggau sida ke kebun. Sebut ke ngalu nya baru iya, agi petang ari udah tembu beradu laban ke deka enggau. Gagit ka meda kedai cina, ka makai roti, makai mee, bepakai ke sekelin bebeli ka utai dikayam.


Mandi Di Pendai & Terejun ari pun kelapok


“ Nuan di rumah angat enda ibuh enggau kami ke kebun. Legi ngacau orang ke gawa nuan legi” piak ko indai (mak) ngasuh aku tinggal dirumah dijaga ine tuai kami.

Laban sida indai (Mak) ti deka beduruk ngetau, enggai mai aku ke umai enggai ke ngacau orang ke ngereja, kelebih agi udu ngeremah bekal ke dibai sida nurun ngetau.

“Au,umah meh ku” piak ko aku jampat nyaut. Dalam ati din udah bisi tuju, bisi kebuah deka tinggal dijaga ine di rumah.

Laban pendai ti enda jauh ari rumah kami, dinga nyau capuh ga bala anembiak ke serambau enggau aku,bisi keduak nya tuai dua tiga taun ga. Ati din enda nemu aku tunga deka nurun tang takut ke disipat orang. Lebih-lebih agi ninga bala kaban nyau beterauh ke begagai, ni nya ,munyi orang ke belagu, munyi sida ke reding-reding nempap perau.

Iya meh sida indai aku udah ngelebus diak deh aku, lalu berumban-rumban ga nurun ke pendai.Sigi nadai tuju bukai, ada nuju pun kelapok di pendai tengah. Dinga nyau bekecebok aja ai alai bala kaban ke terejun ari pun kelapok. Pun kelapok tu endang siti ari nalan tetap bala kami, sigi endur bermain endur begagai.

“Nyin uchai datai….Uchai!!!! aham tehejun kitai” piak ko Atan, bakih ke serambau ari setak ili ke sigi udah ari pagi ngibun pun kelapok nya.

Nama agi deh, lalu diperusut ke tanchut dipunggung,niki ke pun kelapok, laban ti rindu ka terejun ari pun kelapok nya, nunda tarzan keno ko jako….

“ yaaaaaaaa…..Tarzan” dinga nyau semepur ga munyi ai alai aku terejun. Udah nya niki baru ga ke tebing.
“Peda dek kami nyadi tarzan… dek ga Iling tehejun” piak ko Atan ngasuh tudah Siling.

Siling tu tapak anak petunggal kami, tang meh tuai setaun ari aku. Kami serambau ke maianya nya engka aku meh ti pengabis iya biak. Tang sigi ka pepama agi bintis, nadai entu tan sida ke serambau enggau aku iya ke agi tuai setaun dua.

“Aku…inggi gik ku gi akih, enda diak ku gi” ko tudah Siling ga nyaut enggai alah, laban jako ti ka benat-benat.

Terejun siko tampung siko ga…ai nyau keruh diri. Nadai bisi ati nangi ke diri tampun tuga tanchum kayu maia nya. Asal ati lantang ulih bemain di ai, terejun ari pun kelapok.

Peda Budha enggau Robert mansa ga ngena perau pulai ari Nanga Sekerangan. Bisi mai tin peda aku kada enda kasam ikan nya. Perau seduai penuh laban pukat, bubu meh nya.

“Pulai ari ni seduai Uda?” ko Atan nanya aya iya.
“Puli ari ulu arr. Tambit dek pintu tadi? Kami ka ke rumah tu” ko Budha nanya Atan, laban seduai Robert ti deka pulai ke rumah panjai.

“Au…pulai dulu ga aku” ko Atan, lalu merejuk ke ai. Nyau belanda-landa ga iya ngagai perau aya iya dua iko nya laban ti deka nitih ke seduai nya pulai ke rumah.

“OOOO..Uchaiiii!!!!!! Pulaiiii..Pulaiiii…dek legi dek!!! Tu kayu tu makai dek legi!!!!” piak ko tudah Ine rangau-rangau. Kangau Ine nya ngasuh aku nyau salat-salat laban ke takut kediri dipalu iya ngena wee.

“Au..pulai kami deh!! Nadai indai tuai orang ngenyai dek tu…Mengkang ka malu orang aja-aja” piak ko tudah aku ga ngelaban. Laban ke endang sigi ka pama-pama, mulut anang jako bejelabut aja pedis ati kediri agi ka enggau bala kaban main dipendai. Lalu empai puas memain nyau udah ga di kangau ke ine pulai.

“Iya meh tinggal aku ilap mimit, lalu nyau dek ke ai…dek mit dek. Ukai dek entu nemu nyemerai” ko Ine lalu kemba-kemba ga ka malu aku enggau wee…

“Ananggggg..ine..anang….badu..ku badu….” Piak ko aku ga nyerauh..minta kasih meh nya ngicha ke Ine enda malu.

“Pulaiii” ko Ine. Enda ga iya nyadi nyipat aku ngena wee. Aku nyau beguai-guai nyengkau tanchut ke dileka dibaruh pun kelapok lalu belanda-landa pulai ke rumah.

“E.e.eeee…eeeee…” sikok-sikok nyabak… “Ohang agi ka main, asuh iya pulai ga. Uji iya ti iya ka ..eee.ee.e.eee.” ko aku ga sikok-sikok nyabak. Laban ati ti agi keras bendar deka bemain. Naka meh pemedis ati maia nya deh, tang ka enda pulai takut ke disipat ga.

Datai di rumah aku lalu beguai-guai ke tanju tengah ngiga tanchut ke udah rangkai dipengeredai, iya meh aku tama diak deh aku ninga Ine kerus-kerus ga, munyi ke megai plastic kuih. Aku pan ngetu ga nyabak laban tideka nentu nama utai ke di bantai ke Ine didapur. Nyeling-nyeling belalai enda entu nyengala berupai. Tang ine dini ka enda nemu tuju ati aku,sengaja iya nantai ke diri megai plastic kuih.

“Anang badu meh dek nyabak…anang badu” ko Ine ga ninga aku nyau nadai agi nyabak. Peda aku Ine kiting-kiting megai kuih Sarawak (siti ari kuih manis dalam taun 1986).
“Ka kuih Ine..ka kuih” nyau nitik ai liur meda kuih ke dipegai Ine nya tadi. Akai naka meh penyamai nya legi dek-dek, ko anak ati din ga. Nadai ingat kediri baru udah ka disipat ine tadi,ingat kediri baru udah nyabak lalu enda ingat tekalanya laban ti deka makai kuih.
“ Nya..badu segau-segau arr…uji tinduk neh” piak ko Ine lalu nyua ke aku dua singkap. Nama agi deh enda tepansut kejako kelalu gaga nyambut kuih Sarawak nya. Lalu nuduk kediri di teluk diding. Dungam-dungam makai kuih, lalu jari sepiak megai botol tusu ke berisi ka ai kopi. Enda berasai nyau ke puas enngkutung gali aku pan nyau lelap.

***
Ari beganti minggu diak deh datai ga maia ba ari gawai. Bala sida ketuai-tuai, ke bujang endang sigi ari pagi ke begulu ari setak ulu ke setak ili bebai ngirup. Niting pintu dia ruai sigi bisi sedia gelas enggau botol tuak. Ni iya ke mabuk-mabuk mehnya, sida ke belagu,sida ke beramban piak ke bepantun meh nya. Kedua nya nyau ga ngupa pantu,ngupa aping serta beambi ke pun pisang kena ngaga ranyai.
Kami mina ngiching orang ke besadung ke kuih enggau telo manuk. Nganti orang nyua ke ai coca-cola,ai menit. Belawa kulu belawa kili begagai-gagai nya meh pengawa. Nyau puas Ine Indai pantan ngelara, seduai iya Ine Senah. Nadai tau tinggal bala sida penganan,sida chuan, kuih semut enggau mauh kuih bukai diruai. Sigi mungkang nganti orang ke angkat endur belaban ke laluh nya, baju kena ngandut iya. Sigi diati orang ke miring dibilik,ari puting mua kulu lalu ke setak ili maioh bengkah kuih dibantai ke orang. Idup amat seput, penuh-penuh kocek endur nyimpan gula batu.

Ni bala ke baru datai ari menua jauh, bala ke datai ari pasar sigi lalu belabuh meh bebai ngirup pama datai dirumah panjai. Enda mukai-mukai peda aya apai Char nyau enda bebaju, bebatak ke orang ngirup. Sigi endang udah mabuk gaya iya nya, nyau ambis tikai diruai digosok iya.Pejalai pan nyau kayak kulu kayak kili baka ke ka tumbang. Letup nya kapa nyebut, nadai di kena ke mikropon sigi terang bebendang.

Rindu amat ga meda orang maioh maianya. Bala ke rebak-rebak aku pan maioh amat ga laban enggau apai indai sida pulai ke menua.
Baka bala Uchu ibu aku bilik sepiak pan maioh ga. Sida Isaac, Jane, Yee, Siling, Wan enggau Ana. Ni bala iya ke bukai agi, nya ti lebuh mandi lemai rindu meda bala mensia nyau celum aja pala dipendai. Aku laban ke manchal, amat puas meh orang ngelara. Udu amat ka beduan orang, ni ke betuku ke orang enggau batu nadai ngira orang ke kena serta pedis.

Lemai ari udah meh tembu mandi, nya mupuk begiga ke anak gari ke tau di kumbai gari nganta meh maianya. Pasuk ke tanchut jean, lalu baju bigap-bigap ga ngena baju panjai berang ke dibeli aya apai Daniel ke aku pemulai iya ari menua melaya empai lama ke udah. Arap amat ga anak ati, minyak buk code 10 nya lutu aja pala, laban nganta kediri nyambut gawai. Ni nemu bisi indu ke setipak kini, nyelai endar ga ati mit-mit nemu ga ka bisi kaban.

Iya meh malam nyau sampai pagi ga sida ke ngajat, ni nya ke disko, belagu, beramban enggau maioh bengkah main agi. Sida ke bujang-bujang enda ibuh sebut ke agi, endang sigi ngambi peluang bekirum ke surat ngagai pangan diri. Duduk dibilik nusi cerita ngemula ke orang indu, ko ati aku din ga. Bisi ga nemu jeles, laban ke suah ditundi sida ga maia nya. Laban ke nganti tengah malam deka ngirup ai pengayu, iya meh nyau ka datai tengah malam nya tadi diak deh aki aku (Asing) lalu diasuh sida bebiau lalu bakatu ko munyi leka biau tudah aki.

**

Sa, dua, tiga, empat, lima, enam, tuuuuuujuh!
Enda aku busong ngelangkah gunong,

Enda aku tulah ngelangkah tanah,Enda aku danjan ngelangkah bulan,

Enda aku tumbang ngelangkah bintang!
Kaki aku udah bediri di segi besi belumpong,

Nyawa aku nyapa nyembah di klasah tikai bedong long.

Lengan kanan aku ditanggam beringan lanchum selong,

Pala aku di-bap singkap jalong jabong,

Blakang aku ditinggang seludang baju burong.
Laban aku tu ukai mungkal ukai nanjal,

Aku tu endang niti endang nali,

Baka ijok tampung penduk,Baka rutan tampung danan,

Baka ira tampung lemba,Baka wi tampung tali.

Pecah periuk tanah ganti periuk tani,

Padam bulan diganti matahari,

Parai orang ka tuai ganti tubuh kami,

Pambu orang ka dulu ganti kami ka dudi.
Kami tu deka ngintu gawai dayak,

Nitih ka pekat, ngimbai adat menoa Sarawak,

Ngibun durok kitai bansa,

Negi ka menira adat ugama menoa Malaysia,

Ngambika tampak rita idup bersama di mata dunya.
O….Hoi!
Nya baru aku ngangkat ka kita ke lama udah timpat,

Tinggang urat sebangki api.

Tu baru aku nyungkang kita ke lama udah tumbang,

Tinggang batang tebelian wi.

Aku nyerungkai kita ke lama udah parai,

Keranjai indai imbok kedidi.
Tu aku ngangau ka aki kami Sera Gunting,

Ke tau nemuai ngagai gensiring langit kuning.

Ngangau ka tuai benama Begeri,

Ke dulu ngajar kitai beguna ka atau babi,

Laban iya ba indai ka Dara Manis Muka.
Aku ngangau ka aki kami ke benama Sarapoh,

Tuai ke berani nyanda bunoh,

Ringka-ringka ngema benong benda menaga.
Aku ngangau ka Aki kami Pateh Ambau,

Ke datai ari Pangkalan Tabau,

Peling lanting tawang ulih menang bedagang.
Aku mega ngangau ka Gerasi Belang Pinggang,

Seduai Rukok ke Pematak Bala Nyerang.
Aku ngangau ka Petara Betie “Brauh Gumbang”,

Seduai Datu Patinggi Gurang.
Aku ngangau ka Petara Jalir, Petara Gisang,Petara Geringu, Petara Sumbang.
Aku ngangau ka Petara Gerijih Ai Marang,

Seduai Bangkam ke ngaram ka sampan buong Rajang.
Aku ngangau ka Tindin Pimpin Bragah Ngindang,

Seduai Entingi Keti Aur Tulang.
Aku ngangau ka Rekaya Tom Tajai Ngindang,

Enggau tuai entanak benama Unggang.
Ngangau ka Petara Uyut benama Bedilang,

Petara Atin apai Saang,Petara Sabok Apai Mang,

Orang Kaya Dana Bayang,Enggau Chulo bejulok Tarang.
Orang ngasoh aku ngambi ngabang,Ngambi mansang,

Ngambi makai,Ngambi nandai,
Kita ka ari ili datai sabuah barong,

Kita ari ulu undor sabuah buong.

Kita ari langit nilik naka rekong,

Kita ari tanah nyengok naka punggong.

Ngabang abis, ngabang lengis,

Betambit pintu, bekaling alu,Bekaling lantai, bekesai tikai.
Aku ukai ngangau ngapa, ukai ngangau pia,

Aku mai kita ngabang, mai kita mansang,

Mai kita makai, mai kita nandai.Aku mai piring, mai ading,

Piring penganan, piring penyaran,Piring Arak, Piring Tuak,

Udah sedia, udah nyengenda,

Ditikai wi, tikai peradani,Ditikai rutan, tikai bemban.
Kita ke ngabang bakanya mega,

Anang tuboh puang, tuboh sabatang,Anang mai tuboh murus, tuboh untus,

Tang mai ubat serangkap genap,Mai batu teruba nemu,Mai pengaroh gembar tuboh.
Anang engkah ngapa, engkah pia,Engkah ba piring, engkah ba ading.

Ayan ka ba tegalan,Lengka ka ba pedara,Sikap ka di ketupat.

Ngambi ka kena peda, kena tela,Kena iching, kena perening.Awak ka kena genggam, kena simpan,Kena sandoh, kena taroh,Kena japai kena pegai.
Enggau sampi tu,Aku Minta kami chelap-embab,Minta gayu-guru,

Gerai-nyamai,Bidik-lansik,Betuah-belimpah,Kaya-raja,

Aku minta tulang,Minta pandang,Minta iching,Minta perening.
Awak ka kami mudah bulih duit, bulih ringgit,

Bulih padi, bulih puli,

Bulih reta, bulih tengkira,Bulih setawak, bulih menganak

Ngambi ka kami jelai rita, manah nama,

Nuchong baka bukit Rabong menoa,

Tinggi baka langit nungkat neraja,

Terang baka pandang bulan purnama.
Nya alai dinga ka kangau anak mensia,

kangau anak uda,

Minta tulong, minta sukong kita.
Hoo..haaa...

Ko tudah aki ga serta jari iya tu tadi miau-miau ke manok kekiba enggau kanan. Nyau enda bekeretik bala bela bekedunga ninga ke iya ti bebiau endang nadai penimpang sekali-kali. Tembu nya tadi nama deh, nyau kalau-kalau ga panjung bala sida ketuai nanda ke datai maia ngirup ai pengayu. Bisi keduak nya nyau ulih ngerak, nyau giuk-giuk laban ti udah bulih dulu.
Ninting pintu bela bebai ke ai tuak sebotol sepintu begelumu ba ruai kami.
Nyau capuh aja,bala mensia beberi pangan diri ngirup bisi nya madah ke tuak bisa,bisi meh nya minta setujuk aja anang maioh bisi keduak ke jegak agi salin ke orang mimit kumbai alang-alang. Nadai utai ngerindu nya ati meda sida ketuai bebungah.

Iya meh apus gawai, bala temuai pan nyau ga mupuk berinsur pulai. Berasai puang ga asai laban ti udah bisi maioh orang nyau kurang sekurang. Menik-menik mata meda bala pulai ninggal ke rumah panjai. Kelebih agi baka bala petunggal aku bilik sepiak, laban sida ke maioh gawa ba perintah nya tadi enggai nyadi enda pulai ga laban cuti ti nyau ka apus.

Tinggal meh bala ke sigi mangkang nguan rumah aja. Meda mua sida nya baru pan nganti setaun agi meh. Laban keduak nya sebelah kuching,sebelah Miri enggau maioh bengkah menua nitih ke pengawa.

Nyau bekederut aja munyi motor ai sida ke nganjung bala temuai, bala anak sida ke mupuk mulai kediri. Bisi ke empai-empai ga pulai, enggai enda ampit meda orang mupuk sigi sida nganti dipendai din meh meda bala temuai meleka. Seilu-ilu ga diati din deh, laban bala anak temuai ke enggau bebakih nyau ga ambis pulai.

Nginti

Tumu pagi aku udah tembu beradu, bekena ke tanchut panjai, baju panjai laban ti deka enggau sida indai(Mak) ngetau beduruk ba umai sida aki Latong (Asing). Kebuah ke deka enggau tu tadi laban umai sida nya bisi sungai alai nginti. Endang sigi minat ga pengawa nya, nya meh nyau ga tudah diri ngulih ke ginti ridan ke disimpan diujung tanju.

“Kini dek kih?” ko Tanya Siling ke baru ngemesul pansut ari bilik sida, laban ke berimbai bilik.
“Enggau ohang kumbai aku akih. Ka nginti ba sungai Setengang” piak ko aku ganyaut iya, sambil ngulih ke ginti aku ke nyau bebelit enda temu tunga laban ti sigi ditikau-tikau ke aja.

“Enggau ku kih…legi nganti ku..ka behadu” ko Siling ga madah ke diri ka enggau. Kami duai iya endang sigi geng keras ga, sigi mengkang be kin kitu. Iya pan lalu tama ke bilik beradu laba ti enggai ke tinggal.

“Nama empa dek kemahi Iling?” ko apai Senah ga nanya Siling ke benung tukil-tukil ngadu ke ginti iya di ruai. Telabuh ke siko nya mansa, sigi ga udu beduan bala k emit-mit ga iya.

“Buah engkang pa ku” ko tudah Siling ga nyaut, laban jako ke ka benat-benat. Ketawa ga tudah apai Senah ninga saut tudah Siling tu tadi.

“Jampat gi dek akih, ka nuhun ohang. Tinggal dek legi” ko aku ga madah ke Siling. Laban meda bala ari putting setak udah ga mupuk nurun. Aku enda camang-camang lalu nyimpan pukat enseluai dalam uyut ke ka dibai. Duku candung ke digaga apai (Aba) aku endang sigi lama udah dililit ke dipunggung.

Kira penumbas iya, kami pan mupuk ga ngejang ke rumah. Nyau capuh aja bala nengah rantau jalai. Kami ke mit-mit sigi nyadi mangsa diasuh sida ke anembiak ke bebesai gi mai utai. Ni ke ditundi sida ga, kumbai bisi penyamun kena ngeremba. Dini enda takut dudi deh, nyau berumban-rumban ga laban takut ke diri tangkap apai nyamun.


*** Udah meh terenah datai di umai, sigi nadai kiruh enggau orang ke langkau serta ngadu ke pengawa bukai. Lalu nyau terus numbak belut ke umpan ginti. Pukat lalu jentang ke ba lubuk kaki rantau umai sida aki. Nyau besenayau gambar ai empa penyiru, bala enseluai, kepiat,banta, baong amat rindu meda bekulu kili. Bisi tubuh tujuh bala kami bela betumbak ke umpan, nyau rumbak aja tanah dini enda deh laban ti begiga ke belut. Kira umbas meh ko jako diak aku nyau belanda-landa ga ngambu nalan. Enggai ke alah laban sida bukai pia ko jako.

Empai bulih lima minit ginti udah di urur, diak deh baur ridan aku nyau guyap-guyap.
“Udah enggi dek nya Iya” ko Atan ngelara.
“Ishhh” anang ragak, piak ko Isau. Enda ngasuh ngelara, laban ke sigi arap ke penti pemali menua ulu, takut ke jelungan.

Aku lalu narit ginti ke pantai, peda aku keli dachin nyau mesai pun lengan. Naka meh pengaga ngaga ati din. Mecah ke hikod ko jaku ga.

“ Yahoo..yahoo…” ko aku manjung gaga.
“Beli amat iya tu, ngeragak-ragak nya” piak ko petunggal aku Joe ngelara.
Aku enda memunyi mina, nyau cengih-cengih anak gamal. Laban iya ti jauh amat tuai ari aku takut amat ga ke iya, enda berani nimbal. Udah ngulih ke keli nya tadi, lalu di tan aku baru ga ginti aku nya tadi.
“ Tarit enggi dek nya” ko Isau ga ngelara baru. Tuchum-tuchum ga dalam ati din, lalu empai beminit udah ga bulih banta siko kira bisi empat tunjuk. Piak mega enggi sida bukai, sama bela matak-sematak. Rindu amat ga meda, nyau bekedara aja ikan pupu bansa betegaring ditugung ke ba dalam Uyut ke dibai kami.

“Neh..neh…kiak ga iya nikau ke ginti iya….makin kami udah dulu diak..anang ngambu panan uhang “… ko munyi tudah Atan nganu Daud, laban ke enggai diambi siko nya nalan. Nemu ga ngetan ke menalan diri,meda lubuk diak ke manah

Nyau enda berasai ga ari, nyau udah ga ngalih ke tengah hari. Diak deh sida ke ngetau nya nyau belabuh ngetu ga, laban ti ka merarau. Indai aku nyau rangau-rangau ga ari langkau mai ngetu makai.

‘Aham jampat gi ke…legi di anu uhang kitai legi” ko Siling takut ke dianu sida ke di langkau enti lubah. Nyau ga kami tiga mupuk tingal sida empat agi nginti, uyut lalu di bai aku kelangkau.

“Ni ikan ulih kita deh?” ko indai(Mak) aku nanya, meda kami ti ngemesul datai dilangkau. Tu deh, ko aku lalu nyua ke uyut ngagai indai (Mak) aku.

“Apu neh. Nyampau endar ulih sida, upai diri ga laki ine char tu neh” piak ko indai Igang (Pantan) nundi aku, nyau lekah-lekah iya ketawa.

“Ni bisi. Kapa kami indai tuainya…nya Iling nya ka deh” ko aku ga nyaut, enggai dikumbai indai Igang laki ine Char.

Kira ke nyau ka ngalih ke lemai, diak deh kami duai Siling dulu mulai kediri, bela mai ungkup ikan kediri empu enda seretai enggau bala bukai. Aku endang sigi ka ngerumban pulai, laban aya aku, kenyadi sedadu bisi pulai ke rumah sarinya sampal enggau anak bini iya. Tuju ati ukai nama, laban orang ke datai ari pasar nya sigi temu bisi mai sekelin, main kuih. Aya apai Daniel (Awan) bisi pulai ke menua laban ti udah transfer ke sibu gawa, ngundang tudah aki kami ke enda ulih bejalai tambah mega nyau bisi sakit-sakit.

**** Datai di rumah, peda ibu indai Daniel duduk dunga-dunga di tanju ujung bilik.

“ Apu… nama bai dek yai” ko ia nanya meda aku nyau ke ngemak uyut.
“Ikan” ko aku nyaut, agi malu-malu tekuyung. Aruh iya ga nyau lama sida nadai pulai ke menua, tang meh bai ati ke ingin amat ke deka makai kuih ke dibai orang ke pulai ngalu enda ga bersai.
“Niki Iling, lalu enggau kami kitu” ko ibu Indai Daniel ngagau ke Siling meda iya nyau kebil-kebil di baruh rumah ngemata ke aku ke niki. Tudah Siling niki belubah-lubah, engka nya malu-malu ga kini laban temuai ke lama enda dipeda.

Dibilik puas nilik ke meja makai nadai ga meda bungkus kuih. Hah idai, dini meh sida tu engka kuih kini, ku ati din bejako kediri. Meda Ine kiruk-kiruk benung nuchi periuk di tanju ujan.

“Ine bisi mai kuih sida ke pulai ngalu tadi?” ko aku nanya, nyau enda tan agi ati. Nyau enda sabar ka ngekah ngunyah utai ke dikumbai orang kuih.

“Bisi diak tadi, galau aku ke dek” ko Ine nunjuk ke set lauk. Ine sigi baka iya, cukup mentas amat iya suah ka nyipat. Semua utai diempa, utai dipinta aku sigi enda kala enda diturut ke iya. Pulai ngalu enda nemu enda meli ke aku roti meli sekelin. Kadang-kadang ti kami serumah bisi ngal biar iya ngirum ba sida ngasuh meli ke aku roti, meli sekelin. Aku laban ke sigi ari mit begulai enggau seduai iya aki, nya meh bangat diasi.

Diak deh aku lalu beguai-guai ga ngerebak ke set lauk laban ti ngerumban deka ngulih ke kuih.
Japai aku dua bungkus, sebungkus beri ke akih aku Siling ke nyau kinder-kindir nganti ke nyua.

“Aki nusi jerita din, maioh amat bala anak temuai ninga cerita iya” ko Siling madah ke aku.
“Aham tua meda Iling, hekak tua anak temuai legi” pika ko aku ga nyaut tudah Iling, enda meleba ke diri mit ka ngerekak orang.

Kami duai iya pan beentudi ngulu bala anak temuai ke benuk linuk ninga ensera aki. Aki endang sigi ka begulai enggau anak mit, nusi ke sida ensera. Aku nyau ka tiap lemai sigi linuk belama ninga jerita iya sebedau tindu. Nyau enda berasai ga kami duai Siling nyau rindu ga ninga jerita aki nya tadi…

Ko munyi ensera aki…………..


“Nyadi ensera tu nelusor bansa leman utai ke idup, baka jelu, burong enggau indu utai, ngambi ka kita ka mit nemu reti leman pengawa utai idup nya sebengkah sebengkah,” ko iya nganu bala uchu iya ke baka dunga ngimbai iya “Tusoi ka dia meh aki,” ko sida ga ngumbok iya nusoi ensera.Aki pan lalu nusoi ensera ka bala sida nya.Nyadi sekali burong Kejira ngangkut ramu kena iya ngaga tansang baru, laban ramu tansang lama iya udah jai bendar Leboh iya ke terebai manggum uras nya ke ka di kena ngaga tansang nya, dia Kera pan lalu nyapa ari pucok kayu.“Kapa nuan uras nya Kejira?” pia ko Kera.“Eh, kena aku ngaga tansang baru,” pia ko saut Kejira “Kapa nuan kiroh diri ka ngaga tansang baru. Uji nuan nunda bansa kami Kera ke tindok ba puchok kayu,” pia ko Kera nganu Kejira.“Kami bansa Kejira tu enda tau tindok ba sengapa alai, nempaya kediri ba sebelah dan kayu,” ko Kejira nimbal Kera.“Kita ga beli. Kami bansa Kera endang nadai kala begaga ke tansang kenyau ari kelia menya, nadai meh bansa kami tu kala sakit tauka kala mati, maioh meh tuboh kami diau dalam babas tu,” pia ko Kera ketawa rakah rakah ke tudah Kejira ke nyau seput seput manggum uras.Kejira pan lalu enggai iboh ke Kera tang lalu nyau mupok nerebai kediri ngagai alai iya ke ka ngaga tansang baru. Kera pan lalu mengkutong , empakap beberap enggau pangan diri ba sebelah dan kayu. Hari pan nyau majak lemai selemai, Kejira pan lalu pulai ngagai tansang lama iya ke enda jauh ari pun kayu ke alai Kera nya tadi tindok.Iya meh hari pan nyau sabong petang, dia ribut, kabut serta enggau ujan pan balat bendar berengkah mangka ke menoa ka alai sida nya diau. Meda hari balat jai baka nya dia Kejira pan lalu beguai nutup lubang tansang iya nya laban enggai kediri kena laban basah. Enda lama udah nya dia iya lalu ninga munyi utai tak nyau semerap enda jauh ari alai tansang iya nya. Iya lalu irau bendar ati serta beguai nilik ngabas utai ke bemunyi nya. Dia iya meda Kera ke baru badu udah ngumbai diri nyamai enda begaga ke tansang nya tadi, nyau kual kual baka ulat garam ba tengah tanah udah ka di taban ke kayu ke alai sida iya tindok nya rebah.“Nama main nuan deh nyau terjun ari puchok kayu ke bengat ngeninggi nya “ pia ko Kejira nganu unggal iya Kera,?”“Nadai aku tu terjun deh Unggal, nyau ka parai aku tu ditaban ka kayu rebah tadi, nadai agi alai kami sekaban diau. Idup ka aku tu Unggal,” pia ko Kera minta kasih tudah Kejira.Kejira lalu pansut ari tansang iya lalu beguai nata ka ai ba pala Kera, laban enda nemu jalai bukai kena iya ngidup ka tudah Kera ke nyau jengap jengap nya tadi. Makin ditata ke iya makin ga tudah Kera nyau jengap jengap serta rapas agi utai ka di sebut.“Nya meh gaya pengujong kitai ke nadai meruan pendiau serta enda betati ka ngaga tansang ke nyadi rumah alai kitai diau baik maia lantang tauka maia tusah “ pia ko Kejira nyaut Kera.“Nya meh punggal , kami ke endang peturun Kera tu endang selalu dikumbai orang beli belama lama sampai ke jemah ila” pia ko saut Kera ga nyau lesay lesay laban malu ke pendiau diri serta jengap jengap nat ke seput diri ke nyau majak jarang sejarang.Udah nya Kera pan lalu nyau lemi selemi lalu ngapus ke nyawa diri parai. Kejira pan lalu mulai kediri ngagai tansang iya. Sinu ga ati tudah Kejira berunding ke pendiau tudah Kera ke parai di taban ke kayu rebah. Ketegal ti ngemuntang kediri enggai kiroh ngaga alai diri diau.

“ Ambis deh aki?” ko Tipa nanya aki, meda aki nyau ngetu bejerita. Tudah aki kati ko enda ngetu, iya ga ambis tambah mega nyau lelak laban ke ari tadi ka nusi ensera ke bala uchu iya.

“Bulih ikan dek tadi uchu Biai?” ko aki nanya meda aku ke duduk ngimbai iya diak, serta murus-murus belakang aku.
“Nginti dek tadi Yai” ko Dorean petunggal aku nanya.
“Au..bulih maioh-maioh ulih kami tadi aki” ko aku ga nusi enggai ala-ala, tau tak lalu tusi maioh.
“Umpan buah engkang” ko aku ga sengaja nundi Siling.
“Nye…nye..dulu..iya dulu…nundi kitai…” ko tudah Siling ga nyaut.
“Apu nama bisi ninga munyi motor” ko Tipa madah ke diri bisi ninga munyi rengong moror ai datai ari ili. Tentu nya orang pulai ngalu, tauka beambi ke bala ke deka pulai gawai.

Dia deh aku enda camang-camang lalu belanda laban ti deka meda serta nemu sapa ke datai nya. Bala bukai meda nyau beterudus ga nitih ari belakang.

“Anang belawa kita, terap legi” ko tudah Ine Joe ngelara ari tanju meda bala kami nyau beterudus belawa nengah jambatan. Baka ke enda meh, nadai peduli ke jako lara, majak belawa nuju ke pendai. Dinga sida ke merau pan sangkai ga di pendai. Peda Ika Laki Betty benung nanchang ke tali perau.

“Ngalu dek tadi Ika?” ko aku ga nanya. Temu sigi pulai ari ili, tentu ga nya ngalu tang meh enggai enda nanya.

“Dek enda enggau tadi. Bendar amat kami makai mee makai kuih dipasar tadi” piak ko Ika ga nundi aku.
“Dek enda madah” ko aku ga nyaut.

“Nyamai dirumah Ipa?” ko Iya ga nanya Tipa ke bisi enggau kami ngandak sida ke pulai ngalu.

Tudah Tipa mina linsum-linsum aja agi malu-malu laban ke baru beteleba enggau bala dirumah panjai.

“Wat, mandi aham” ko aku ngangau ke Steward anak petunggal aku ke baru sangkai. Steward tu diau di Miri enggau sida apai enggau indai iya, maia tu sida iya pulai cuti gawai.

“Peda iya Uchai, enda nemu nyemerai iya nya” piak ko indai iya madah ke aku. “ Nya bagi sekelin dek nya Wat” ko inda iya ga madah ngagai Steward ngasuh magi Sekelin ke ba bungkus plastic ke dipegai iya.

Nama agi deh, tachuh meh pendai laban bala kami ke begagai mandi. Ni ke belanda, ni ke nikau ke batu. Keduak mega beduan pangan diri, betuku-tuku ngena tanah ladu. Nyau ambis latak mua, tubuh. Sida ketuai ari ili nyau rauh-rauh ngelara laban ai ti keruh ketegal kami ti bemain ari ulu enggau tanah ladu. Perau pan nyau ambis latak ga kena tuku. Sigi bisi kena anu legi enti sida aki bisi nurun ke pendai meda perau iya nyau ambis latak.

Enda mukai-mukai nyau kalau-kalau ga nyawa ine ngangau ngasuh pulai.
EEEE…indai tuai orang tu…enda tau meda kitai mandi mimit… pia ko ati din ga.
“Au..pulai meh aku tu… aham pulai” ko aku mai sida Steward enggau bala petunggal aku ke bukai. Ine sigi enda nganu sida iya, laban sida baru datai. Tang aku sigi tetap enti enda lalu pulai nitih ke perintah.

Nyau ga kami pulai kerumah, laban takut ke diri dianu Ine legi. Peda aku sida indai(Mak) aku udah ga datai benung meruti ikan enggau ibu didapur.

“Apu dek tu. Iya udah ga mandi iya agi ga latak. Mandi diak dek!!! Buka tanchut dek nya engkah ba beledi. Mandi!!!” ko Ine merak aku. Meda pending, pala nyau agi lekat latak udah bekau ke bemain tanah ladu di pendai. Aku enda memunyi taja pan ati pedis, takut ke dilunsin. Lalu nuju ke tanju ujan, peda aku ine udah sedia busut kena ngerunsur meri aku mandi.

“Kitu ke dek aku nerusur tubuh dek nya. Nyau latak enda temu tungga” ko Ine. Aku mansang begadai-gadai ngagai Ine kiak.

*** Lemai ari…

Nama meh api tu lama amat empai dipasang, ko anak ati din ga bejako kediri. Meda injin api lalu empai ga diidup ke sida ke nyaganya, laban ati ti beguai deka meda jerita TV. Enda lama udahnya dinga nyau derut-derut ga munyi lipan datai ari bukit.

Apai(Aba) aku ti baru pulai ari endur kereja, lalu mai lipan pulai kerumah panjai. Rumah panjai kami sigi datai jalai kem batang, laban maianya kerja kayu pan baru ga belabuh dimenua kami. Seninjik bendar ga injin api pan dipasang, nama agi deh tampak meh bilik. Sigi nadai tuju bukai, berumban-rumban ngelawa ruang tamu laban ti deka meda jerita TV.

“Yai..yai..yai…” ko pertunggal aku ngangau ke aku, belawa-lawa iya.
“Nama nya arr?” ko aku ga, ke benung jenuh meda cerita katun GI Joe.
“Besai..besai babi ulih aya…peda dek kin” ko tudah Tipa. Ninga munyi nya nyau belawa-lawa ga aku kin ka meda naka ni pemesai babi ulih apai(Aba)aku. Datai din, apu tak naka-naka iya pemesai ga babi nya. Taring nyau sepemaut, nyau takut meda gamal, nya baru gagut babi.

“Nya ganti ngeli dek yai. Ganti enggau ngeli babi nya. Manah nya” ko aya apai Daniel beduan aku meda ngeli tudah aku ke tachak gerama.
“Ngai…nya enggi Ine nya ganti” ko aku ga nagsuh nganti enggi Ine…
“Gamal ngengemit nya nemu ka nundi aku, tak jegak-jegak” ko ine gak nganu aku. Nyau rising-rising ga tudah aku tadi ninga ine munyi nya.

Bala sida ke tuai-tuai nyau maioh ga datai sedatai ngusung bilik kami. Laban ninga sida aya apai Daniel bisi pulai lalu di kangau ke aya aku bilik sepiak nunu babi.

“Apu lawa amat dek tadi bulih ikan enda meri aku deh uchu” pia ko aki Igang ke junok-junok datai ari mua pintu ruai.
“Dek lawa gek aki, bubu dek bulih lelabi kemari” ko aku ga nyaut iya. Laban lebuh aku kemansa iya pulai enggau sida indai ari umai kemari, bubu iya amat bulih lelabi, kira sejengkal meh kerubung kering.
“Bebelacan tunu..indu belacan tunu” ko aku ga beduan aki Igang, laban iya keselalu besema ka indu belacan tunu lebuh ti nganu bala iya.
Nyau ketawa ga bala sida ke ditanju ninga aku munyi nyak.

“Mali nundi aki dek bakanya” ko indai aku ngelara enda ngasuh aku nunda ke aki Igang nyebut “indu belacan tunu”.

Randau bala mensia pan nyau rancak serancak, peda bala sida ke indu-indu nyau be bai ke periuk ga ari ruai. Deka makai beserumpu meh nya, tambah mega apai aku bulih babi. Kami segerup nama agi deh, makin orang maioh makin majak ga bejelangkit sebelah tanju,minta tu minta nya. Nyau puas in eke ngutap. Ni nya ke nyabak meh bala keduak, iya ke enda tan agi meh nya.

“Ditu kitai uchu… Kitu ke dek aku nusi ke dek ensera baru” ko aki ngangau ngasuh aku tama. Engka nya nyau bangai ninga ine mutap ngelara aku meh nya. Ninga munyi nya, nyau ga aku duduk ngerimbai aki laban ti sigi amat minat ga ninga ke ensera aki. Aki endang sigi pandai amat nusi ensera, iya ga baka kea mat-amat ga nusi utai. Bala petunggal aku mega nyau beterudus ga nitih sama bela ka enggau mending ke ensera ke ditusi aki.

Sida ke didapur nadai dipeduli ke kami agi, nyau rangap-rangap nganti aki ke belabuh nusi cerita…..

Ensera aki…..


Tumu pagi siti Apai Sali enggau anak iya ngaga bubu laban ti ka ngulih ke ikan tegal ti nadai utai ke lauk sida menyanak. Sehari hari seduai menyanak begaga ke bubu ba babas din lalu semua bubu ke ulih gaga seduai iya nya seratus iti. Lalu siti ari bubu ti digaga iya nya pengabis besai ari semua bubu bukai. Nyadi pemesai bubu nya, iya nya umbas alai Apai Sali empu bediri lalu peninggi iya nya nyentok ka datai ba sadau rumah panjai sida.Hari pan nyau ngalih alai Sali seduai Apai iya lalu mupok ngagai sungai ti ka alai seduai iya nan ka bubu ti udah tembu di gaga seduai nya tadi. Tan seduai iya bubu nya ari ulu mansang ke ili lalu chara Apai Sali nan ke bubu nya nyelai bendar iya nya mua bubu di tungga ke iya ke ulu lalu burit bubu nya di tungga ke iya ke ili. Iya meh bubu seduai menyanak nyau tembu di tan lalu hari pan nyau malam. Batang sungai ke alai seduai menyanak nan ke bubu pan nyau ka apus ga alai seduai iya ngetan ke semua bubu seratus iti nya.Ukai anchi anchi pemanjai batang sungai ti alai Sali seduai apai iya nampun ke semua bubu seratus iti nya tadi, lalu nyau ka enda alah seduai iya nembu ka tampun bubu nya. Nyadi bubu ke pengabis besai nya di tampun ke seduai iya ba nanga sungai. Nyadi nanga sungai tu tadi benanga ba tasik besai. Sepenembu seduai iya menyanak nan ke bubu ti pengabis besai nya Sali seduai apai iya lalu mulai kediri ke rumah laban nangi enggai kediri enda olih pulai ti hari nyau majak petang serta malam.Datai Sali seduai apai iya di rumah, dia indai Sali ti benama Enchelegit lalu beguai berapi ke sida tiga menyanak enggai ke laun makai lemai. Nama agi deh naka iya penyampat iya nanggar ka asi serta bepandok ke lauk. Asi ke ditanggar pan mansau, sida tiga menyanak lalu belaboh makai lemai. Udah badu makai lemai, dia Apai Sali lalu nindok ka diri laban ti udah kelalu lelak begaga ke bubu serta nampun ke semua bubu seratus iti nya ba batang sungai semak alai seduai iya nampun ka bubu nya. Tambah mega iya ti beguai tindok nya ngarap ke diri tau bisi bolih mimpi manah udah ti bekau seduai iya nampun ka bubu lemai nya tadi. Iya ngarap ke semua bubu ti di tampun ke seduai iya Sali nya bolih ikan maioh pagi ila. Tak enda berasai laban ti kelalu lelak serta jenak dia iya lalu tekenyit serta tedani laban ninga manok mengkokok nanda ke hari nyau teberingkas tawas.“Apo Duat dani ! tawas hari tu anak, aram tua mupok ngabas bubu ti ditampun tua kemari” Pia deh ko Apai Sali ngerak Sali enggai ke seduai iya laun mupok serta enda tebuat ke semua bubu ti ditampun seduai iya lemai kemari. “Manah bendar mimpi aku malam tu tadi, tak bemimpi asai ke di beri orang buah rampu dua lanji” ko iya. “Aram meh apai, ngicha ke bubu tua nya lagi bisi bolih ikan” pia deh ko saut anak iya Sali. “Oh Indai Duat ! Nuan berapi lagi anang ngena periok ka mit ke selalu di kena kitai tiga nya tang tanggar ke nuan sampau ke besai nyin. Nya kena nuan berapi enggai ke asi empa kitai tiga lagi enda umbas.” Ko Apai Sali madah ngagai bini iya Enchelegit.Udah nya Sali seduai apai iya lalu mupok nurun ka batang sungai. Datai seduai iya ba batang sungai dia seduai iya lalu dulu ngabas bubu berengkah ari ulu, indah enda baka gaya seduai iya ti ngetan ke tampon bubu nya kemari. Nyah, lalu diangkat ka Apai Sali bubu ti keterubah mampul pengabis ulu bender tang lalu nadai ga bolih ikan. “Oh! Iga ga petara enda ngalih ke burit bubu aku ngasoh bolih ikan,” pia ko jako Apai Sali nya tadi. Udah nya datai ba bubu ti siti, lalu di angkat ka iya tang nadai ga bolih ikan.Nama agi nyau bejako kediri Apai Sali, “Akai apai ! Akai indai! Iga ga ikan tu tak bengat enggai tama ngagai bubu tua deh anak. Eh bula bender ga mimpi aku malam tadi,” pia ko iya bejako ngagai Sali ti nyau gisai gisai di empa kerengit ba tebing sungai nya. Datai seduai iya ba bubu siti muak ka ari ili nya nadai ga seduai iya bolih ikan. Nama deh utai ke olih seduai, iya ga semina daun serta raw aja ke bisi ngemenoh ka bubu seduai. Laban bubu ke ditampun ke seduai iya mua nya di tungga ke ulu. Bubu pan nyau abis di angkat ke seduai ari tampun tang siko ikan pan nadai ga olih seduai iya lalu ka tinggal bubu ti pengabis besai nya aja ti bedau diangkat ke seduai iya Sali ari tampun ba nanga sungai nya.Leboh seduai iya Sali nyau datai ba nanga batang sungai nya, dia Apai Sali pan lalu beguai ngangkat ka bubu seduai iya ari tampon nya. Di angkat ka iya enda ga olih, lalu di uji ka iya baru ga ngangkat ka bubu nya enggau naka pengering tulang iya empu tang lalu bedau ga olih angkat ari ai. Nyau ke puas tudah Sali meda apai iya nyau kual kual nguji ngangkat ka bubu nya kediri dia Sali lalu terjun ka ai nulong apai iya ngangkat ka bubu nya ari tampon. Tak nyau bebendar serta seput seput seduai iya menyanak ngangkat ka bubu nya, nya baru bubu nya tadi olih di angkat ka seduai iya. Nama agi deh tak nyau semina ke enda luput seduai iya abis ati tekenyit meda ai nyau besimbor laban siko lelabi ti naka iya pemesai mesai tama dalam bubu ti di tampun ke Sali seduai apai iya nya tadi. Pemesai lelabi nya, iya nya kerubong kering serta lalu ngaum kapir nyau bolih tiga depa. Lalu pala lelabi nya nyau besai agi ari buah embawang.Sali pan lalu manjong ketegal ti kelalu gaga. “Apo apai! Besai amat lelabi olih bubu tua tu deh,” ko iya. “Eh ukai nya lelabi deh anak, daun mengkubong nya iga ga nuan enda ngelala,” pia ko Apai Sali ngemula ka Sali. “Ukai nya daun mengkubong deh apai, endang tak lelabi nyengenda raya nya. Peda nuan iya nya ngerayap deh,” pia ko Sali ga madah ngagai apai iya ti agi benong nan ka bubu nya tadi. “Kati ko enda ngerayap deh, bubu tu ga digusak aku, daun mengkubong nya, ukai utai bukai endang tak nyata daun mengkubong,” pia ko Apai Sali ga ngemendar ke jako diri bebula ka Sali.Leboh Sali enggau apai iya datai di rumah, dia Apai Sali lalu beguai bekindu laban ti udah kelalu chelap ba berendam ba ai sepagi nya sekumbang ti ngabas bubu, nyau getar getar tudah Apai Ali tu nat kediri chelap. Leboh iya ti bekindu nya dia iya lalu sengaja nunu iko sirat iya ba api ti alai iya bekindu nya, iya lalu madah kediri pedis perut serta lalu ngasoh Sali ngambi kayu ba para enggau duku ke dikait ke iya ba tisi para. Sali pan nanya iya kena iya apa kayu enggau duku nya deh ti ka mansang bira. Apai Sali lalu madah ke kayu nya ka ke sengkilu iya lalu duku nya ka kena iya melah kayu nya nyadi ke sengkilu ambi ke mit agi. Tang iya ke bendar kayu nya ka di kena iya menyadi ke api laban api udah bisi ba iko sirat iya lalu duka nya ka di kena iya ngelampang lelabi ke olih seduai iya Sali ke di kumbai iya daun mengkubong. Nama agi deh udah kayu enggau duku nya di sua ka Sali ngagai apai iya dia Apai Sali lalu beguai guai mupok madah kediri ka bira laban iya ti ka naban ke api ke lekat ba iko sirat iya nya ke tebing batang ai, ambi ke bisi di kena iya nunu lelabi ke di peda seduai iya Sali tadi ti agi bedau tinggal dalam bubu. Udah meh api nya ke alai iya bekindu nya tadi lekat ba iko sirat dia iya lalu nganggau ke Indai Sali, “Oh Indai Duat! Aku deka bira pedis amat perut tu chelap bai berendam ba ai sekumbang kami duai Sali ti ngabas bubu tadi. Seduai Sali anang nganti aku makai tengah hari lagi,” pia ko Apai Sali bejako enggau bini iya Enchelegit.Nama agi deh nyau beguai guai Apai Sali tu tadi belanda naban ke api ti lekat ba iko sirat iya nya laban enggai ke api nya padam. Datai ba tebing batang sungai enda jauh ari alai seduai iya Sali ngetan ke tampun bubu ti pengabis besai nya tadi dia iya lalu beguai guai ngenyadi ke api ngena api ti lekat ba iko sirat iya nya tadi ambi ke bisi di kena iya ngintu lelabi. Udah nya Apai Sali lalu beguai guai ga ngangkat ke bubu ari tampon lalu munoh lelabi nya tadi serta mela iya.Udah Apai Sali ke madah kediri nurun bira ngagai Indai Sali dia Indai Sali lalu nanya Sali. “Kati ko Sali, bisi bolih ikan bubu seduai apai nuan pagi tadi,?” pia ko iya. “Bisi! bisi indai, bisi aku meda siko lelabi tadi besai bendar dalam bubu ti di angkat ka apai. Tang apai madah ngagai aku nya ukai lelabi tang duan mengkubong,” pia ko saut Sali.Ninga munyi nya Indai Sali pedis bendar ati, ninga Sali enggau iya ti udu dikemula ka Apai Sali ti madah ke seduai iya Sali pulai ngabas bubu nadai bolih utai. Indai Sali lalu mai Sali bepekat nitih ke Apai Sali ngagai tunga seduai iya Sali ti ngetan ke tampon bubu ke bisi bolih lelabi nya tadi. Datai Sali enggau indai iya ba semak alai Sali seduai apai iya ti ngetan ke tampon bubu nya dia Sali enggau indai iya meda Apai Sali nya tadi benong kiroh ngintu lelabi nya nengali. Indai Sali lalu mai Sali bepekat ngelulu ka diri nyadi ngingit.Sali enggau indai iya lalu belalai ba babas kira ka semeda ari alai Apai Sali ti nunu lelabi nya tadi. Sali enggau indai iya pan lalu berengkah ngelulu kediri munyi ngingit. “Ngit ! Ngit ! Ngit ! Ngit !. Meri aku pah lelabi nya sepiak ! Enti nuan enggai meri, lagi aku kerebok leka mata nuan,” pia ko Sali enggau indai iya ti ngelulu kediri nyadi ngingit ba babas nya.Apai Sali lalu takut ninga ngingit nya tadi lalu nimbal, “Oh! Antu nama, antu apa kita nya bengat bam bangam, nemu bepinta ka lelabi ti benong di intu aku tu. Enggai aku meri kita nya deh,” pia ko Apai Sali nimbal enggau nyawa tin aka iya pengingar. Indai Sali pan lalu nyaut madah Kediri nya Antu Bunsu Ngingit.Apai Sali pan naka iya penakut leboh ti ninga Antu Bunsu Ngingit nya tadi ti minta pah lelabi ari iya. Iya pan lalu nadai runding serta lalu beguai ngelampang pah lelabi nya serta lalu ditikau ke iya ngagai tungga ari ni alai penatai munyi ngingit ti minta nya tadi.Udah nya Antu Bunsu Ngingit nya tadi agi ga bemunyi baru. “Ngit ! Ngit ! Ngit ! Ngit ! Meri aku pah lelabi nya sepiak agi ! Enti nuan enggai aku kerebok leka mata nuan sepiak da agi.Apai Sali pan lalu nyaut Antu Ngingit nya, “Eh nadai aku tu ka meri nuan nya agi deh”. Antu Bunsu Ngingit nya pan lalu nyaut, “Enti nuan enggai meri aku kerebok kedua dua piak ga leka mata nuan nya lagi,”. Nama agi deh Apai Sali lalu naka iya penakut, lalu beguai nikau ka lampang pah lelabi sepiak da agi ngagai tungga Antu Bunsu Ngingit ti bemunyi nya. Iya pan lalu beguai guai ga majak ngelampang lelabi nya serta nyau ginyah ginyah nguyas isi lelabi ke di tunu iya nya tadi laban enggai ke abis di pinta Antu Bunsu Ngingit. Tang enda lama udah nya iya lalu ngetu nguyas isi lelabi ke di intu iya nya laban Antu Bunsu Ngingit agi bemunyi baru. Lalu munyi Antu Bunsu Ngingit ke sekali tu iya nya, “Ngit ! Ngit ! Ngit ! Ngit ! Aku ka minta semua isi burit lelabi nya ! Enti nuan enggai meri aku ambi telu pelir nuan sepiak.Apai Sali pan lalu ringat serta nyaut Antu Bunsu Ngingit. “Nadai aku tu ka meri nuan agi deh, ni ke empu aku ke ngulih ke lelabi tu deh,” Antu Bunsu Ngingit lalu nyaut, “Enti nuan enggai meri, aku ambi kedua dua igi telu pelir nuan nya lagi.”Nya meh Apai Sali nya naka penakut lalu beguai nikau ka semua isi burit lelabi nya ngagai tungga Antu Bunsu Ngingit ti bemunyi nya tadi. Iya pan naka olih meh ngeruyas isi lelabi ke di tunu iya laban nemu diri sigi berebut enggau Antu Bunsu Ngingit. Apai Sali pan enda olih meda enggau terang ngagai alai Sali seduai indai iya ti belalai nyadi Antu Bunsu Ngingit laban asap iya ti nunu lelabi nya balat bender laban kayu ti di kena iya nunu nya basah. Udah nya tadi lalu di kumbai Apai Sali udah rari Antu Bunsu Ngingit ti bepinta ke lelabi ari iya. Sekali dinga iya inggar agi ga munyi Antu Bunsu Ngingit nya munyi tu, “Ngit ! Ngit ! Ngit ! Ngit ! Aku minta tubuh lelabi nya, enti nuan enggai kaki nuan sepiak nya aku gigit.” Apai Sali lalu nyaut madah kediri endang enggai meri agi. Ninga Apai Sali ke madah kediri enggai agi meri lelabi dia Antu bunsu ngingit lalu madah kediri ka ngambi kedua dua piak kaki Apai Sali nya.Apai Sali pan nadai olih bejako maioh tang nurut ka utai ti di pinta Antu Bunsu Ngingit. Lalu ke pengabis iya semina utai ke enda di pinta Antu Bunsu Ngingit nya ari Apai Sali iya nya kerubong lelabi aja. Apai Sali pan nyau chukup lelak belanda kin kitu betikau ke lampang lelabi nya ngagai Antu Bunsu Ngigit. Iya pan nyau ka tengah hari dia iya lalu mulai kediri merau ngena kerubong lelabi laban ti nyau enda dapat agi bejalai tegal ti udah lelak serta pedis betis.Datai Apai Sali di rumah, dia iya lalu nindok kediri laban ke lelak serta ti udah madah ngagai Sali seduai indai iya ti enda iboh nganti iya makai tengah hari nya. Leboh ke tindok Apai Sali jenak bender serta lalu bekuroh, lalu nyawa Apai Sali pan nyau ranggap ranggap baka nyawa baya ti ngeradai ba tebing sungai.Meda baka nya tudah Indai Sali laban ti agi pedis ati lalu mai mangkok siti serta mai penyiar penyapu kena iya ngulih ke tingga ba selepak ngeli Apai Sali laban nyawa iya ti nyau ranggap ranggap maia tindok nya. Tingga Apai Sali nya tadi lalu di pandok Indai Sali ngena periuk batu. Iya meh nyau maia sida ka makai lemai dia Indai Sali lalu ngerak Apai Sali be bai makai lemai. Apai Sali pan lalu tedani serta nanya Indai Sali, “Nama utai ke lauk kitai lemai tu deh Indai Duat,” ko iya. Indai Sali lalu nyaut, “Bisi ! Bisi Apai Duat, bisi aku mandok telu manok dua igi tadi,” pia ko iya. Indai Sali lalu ngenah ka Apai Sali makai.Apai Sali pan lalu belaboh ga makai lemai belauk ka tingga ngeli diri empu. Benong ke makai nya dia Apai Sali lalu nanya bini iya Enchelegit. “Nama asai telu manok tu tak penat deh Indai Duat. Ti ngelama tu nyamai bender asai telu manok. Kada telu tu digulai nuan enggau garam deh tadi,” pia ko iya.Indai Sali lalu bejako, “Keba nuan tu tambap, nuan tu lap. Enda ga nuan nemu diri makai tingga diri empu. Nuan ga udu rangka makai lelabi nya nengali kediri.” Pia ko tudah Enchelegit. Apai Sali lalu badu makai tekala nya serta pansut ka ruai. Iya udu ringat serta malu kediri empu laban ti rangka makai lelabi olih bubu seduai iya Sali nya nengali. Sali pan lalu ketawa nyau rakah rakah bepichit perut ninga indai iya ti madah ka apai iya bam makai lelabi nengali lalu makai belauk tingga diri empu.Nyau udah nya baru Indai Sali nuang ka ruas pansoh lelabi ke olih seduai iya Sali ngelulu ka diri nyadai Antu Bunsu Ngingit maia Apai Sali ti nunu lelabi. Sali enggau indai iya pan lalu belaboh makai lemai. Ninga Sali enggau indai iya belaboh makai di bilik dia Apai Sali lalu beguai tama baru ke bilik lalu nudok kediri enggau makai. Iya pan lalu tekenyit bender ati serta lalu nanya, “Nama lauk tu deh ? Pansoh nama tu deh ? Nama tu tak baka pansoh lelabi enti enda saru aku ? Dini nuan bolih lauk tu deh Indai Duat ? pia ko Apai Sali.Indai Sali lalu nyaut, “Lelabi olih bubu ke di tan ke aku ba nanga batang sungai di ili din,” pia ko Enchelegit. “Essss ! Nuan tu ke ngaga diri nyadi Antu Bunsu Ngingit pia?” Enti aku nemu nya nuan ka ke sekerat pa enda meh aku tu meri nuan tadi,” pia ko Apai Sali. “Keba nuan tu tambap, lap, makai utai nengali kediri,” ko Indai Sali. Ninga jako Indai Sali munyi nya dia Apai Sali lalu ringat baru serta pansut ke ruai lalu enggai enggau Sali ngabas ginti agi.


“Hahaha…amat beli apai Sali neh aki” ko aku ga ninga jerita aki nya.
“Agi…agi..cerita bahu aki” ko Tipa.
“Umbas nya, pagila cerita baru ga” ko aki.

Diak deh Ibu Indai Daniel nganjung ke kami tunu babi. Nyau berebut gab ala bejengkau, nyau ambis ka lungkup pinggai. Tudah aki laban ke enda dapat, mina tak meda aja meh ulah bala uchu.

“Iya lapa nya bangat baka nya deh angat. Jegak endar dek tu arr” ko apai(Aba) ngelara meda aku nyau dua-dua piak jari megai tunu babi,mulut nyau kunyap-kunyap. Tudah diri laban ke nadai tentu ngeli kena nganit nyau puas nguyas-nguyas ke tunu babi enggau jari.

Bala didapur nyau capuh aja, ni ke makai, ni ke bepakai ke tunu babi. Tambah mega bisi ga ai mabuk (ai tuak) dibantai ke indai aku. Nya nyau majak besai letup bala ke duak. Ni ke nunu babi meh bala keduak.

Udah meh makai mata nyau ga berasai ngantuk, nama agi deh nyau begelumu ga bala kami sepetunggal ninduk kediri di bilik besai (ruang tamu) enda ulih agi enggau bala sida ke tuai didapur.

**** Pagi siti

Nama meh gaga orang maioh amat ko anak ati din nanya meda orang ngemaioh nya ba taba sida aya apai Daniel. Laban ti deka nemu nyau ga aku ensulun kin, ka meda nama gaga orang. Peda aku sida ke tuai benung besanggit ke ramu, keduak nya benung janggit-janggit bepantang ke utai.
Laban ke empai nemu nama tuju utai, mina tak peli-peli aja meh ngemata.
Bala maioh benung nyaup aya apai Daniel mupuk ngaga rumah iya, ke nampung sida ibu aku bilik sepiak.

*****

Ari beganti minggu, bulan beganti taun umur aku pan nyau ga manggai 6 taun. Diak deh bala kaban ke serebak aku aku maioh udah mupuk dianjung apai indai sida besekula di SRK Nanga Machan. Nyadi laban rumah panjai kami ke jauh ari sekula nya alai sida tu tadi diau di Buding @ Asrama. Pulai ke rumah panjai pan mina dua minggu sekali. Diau di rumah aku pan nyau bisi ga berasai puang, laban ti nyau nadai kaban enggau betundi,begagai piak mega enggai bemain sebelah pendai. Tambah mega nadai orang nusi ke aku ensera agi, laban aki kami nyau ga udah nadai. Iya ninggal ke kami maia umur aku manggai 5 taun, iyanya taun 1988.

Nyau puas niap ari, puas nanya indai kemaia meh bala kaban aku datai. Ari siti bakanya, ari siti nanya ke nya ga. Sampai nyau nyida orang nyaut. Tudah diri nama agi deh, sigi di kebun din meh enggau sida indai besari-sari. Pulai kerumah enda pan sigi nyau dini ari meh, diau dilangkau nganti sida indai ke tembu ngumpul lada, nyepiang lada, begumpul ke buah koko serta maioh macam agi pengawa kebun ke bukai.

“Hah..idai, kemaia meh aku ulih besekula deh” ko aku ga bejako dalam ati diri, laban pengingin ti bisi ka nitih ke bala kaban aku ke dulu agi.

Nyau ke puas dugau-dugau tadi, tepeda ke ine benung nganyam uyut di ruai. Manah endar gamar uyut nya, nama meh ine ngaga uyut ngemit nya deh ko ati aku din.

“Ine enggi sapa uyut nya ine?” ko aku nanya, pama meh ngicha ke ine ka meri ke aku ko jako. Laban ati din endang sigi bisi pengingin ka beempu uyut nya kena ngumpul engkabang.

“Enggi dek meh tu uchu. Kena dek enggau orang ke kebun. Nya ni mengkang mai uyut nyau besai gi ari tubuh” ko ine nimbal aku.

Ukai anchi-anchi ga pengaga ati din ninga ine ti madah uyut nya enggi aku. Naka iya pengandal ga ati bisi uyut baru kena enggau orang ke kebun, ulih ga mantai ke bala kaban aku ila ti sida pulai sekula.


Bulih Tengiling & Lelabi

Nyau betekilap aja api picit, lampu kebait bala mensia ke nurun nangkal. Aku laban ke sigi endang ke kaling indai(Mak) aku nangkal getah kami di sebiru ari ulu rumah, kira pejalai sejam meh ari rumah panjai. Nyau bigap-bigap ga nitih ari belakang, arap amat ga anak ati ngema uyut baru jari sepiak megai picit lalu sepiak mai gilin puang alai nyimpan ai getah. Iya meh utai ambis ke telentang ga aku laban ditagau ukoi kami ke endang sigi bagas ke kaling aku enggau indai nangkal.

Kadang-kadang nya aku ngumpul sekerap getah, ti udah bisi dua ari ngumpul ditakah ke aku ga udah nya. Maia ke enda nya tadi aku mina diau dilangkau nganti indai aku(Mak) ke tembu nangkal. Sekerap nya sigi enggi aku aja, gumpul aku maio-maioh udah nya ti aya aku apai Imah enggau Indai Imah bisi ngalu baru aku seretai seduai iya nyual sekerap aku. Kadang-kadang sampai lima ringgit pupu rega sekerap aku, ni enda cukup deh kena aku bebeli ke utai ke deka dipakai aku. Anak kuih meh nya ke dibai aku pulai kerumah. Aya enggau ibu ka amat ga bekaling enggau aku lebuh maia ke ngalu, laban aku pama mudik tauka undor sigi diluan belama ngeluan ke aya. Sigi anak orang menua ulu, taja pan umur agi mit tang aku udah ulih ga ngereja pengawa ke anak rumah panjai ke lempung-lempung.

Pulai ke cerita kami duai indai nangkal tadi,datai kami duai indai di madang getah diak deh indai aku tadi lalu belabuh nangkal. Aku diasuh iya nganti dilangkau, laban ke empai ngasuh ngerejang enggai ke terejang ke batang getah keno ko sida. Nama deh agi, lalu belabuh meh aku tu tadi numbak belut kena aku nginti ba sungai enda jauh ari langkau ke alai aku nganti. Ginti baur ridan aku endang sigi udah sedia nya di panggai ke aku ba pucuk empelam, takut ke ditaban ke orang kenu ko anak ati din.

Kira meh cukup ko ati din umpan belum ke ditumbak aku nya tadi, nya baru aku mupuk ga ngait ke ginti lalu ngetan ba sungai. Laban ke sigi endang udah teleba, sigi utai pengawa ga nya diau dirumah panjai.
Nyau ke puas nginti empai ga bisi ngait, diak aku nyau ingat ke bubu aku dua iti ke di tan aku mua kulu ari jambatan sebiru. Tentu nya bisi bulih ko ati aku din, manah aku ngabas dulu. Aku pan ngujak ke ginti, aku diak lalu belanda-landa nuju tampon bubu ke ditan aku. Datai din tadi, angkat ke aku peda mina ka dua iko banta dalam bubu aku nya tadi. Dalam ati aku din, enda patut sungai ngemanah tu nadai ikan. Tu sigi nadai orang bukai sigi aki apai Awa tu enchuri ikan aku, pia ko sagam ati din. Lalu terus nyangka ngapa, laban tudah ke bemalam semak enggau alai tampon bubu aku nya tadi.

Nyau ga aku ke ulu agi, datai aku dulu lalu diangkat ke aku ga bubu aku. Peda aku lelabi kira sejengkal meh kerubung kering, dalam bubu aku. Baong bisi ga dua iko. Tu baru iya, nasib ga bubu aku tu enda diabas aki nya tadi ko aku ga bejako kediri majak nyangka aki apai Awa ngachau bubu aku.
Nama agi deh, nyau beguai-guai meh aku ngulih ke baong lalu tepu aku dalam uyut, lelabi nya tadi bai aku enggau bubu-bubunya meh pulai ke langkau.

Empa pengelama aku rindang, datai din peda aku indai aku benung duduk belelak ngirup kopi. Lalu benung bebantai ke bekal. Tak enda mukai-mukai ga benung aku ke deka ngengkah ke bubu aku diak deh aku tekenyit laban ti ditegah aki apai Awa ari belakang.

“Cei..dek tu…. Aki… Nya ikan aku nadai curi dek neh” ko aku ga..laban ti pedis ati ditegah iya..tambah ga sigi nyangka iya encuri ikan aku dalam bubu tadi, laban mulut ke sigi panchar amat.

“Apu…..mali munyi nya anak empiak ke aki dek” ko indai enda ngasuh aku nyebut utai munyi nya.

“Dek ga nadai..curi aku meh ikan dek” ko aki nya tadi ga ngeranjur..

Nya meh ati aku nyau majak pedis agi.
“Ulih gamal rabang” piak ko aku ga, kena mantup ke pemedis ati.

Aki nyau majak ga rising-rising ketawa meda aku ti ringat. Diak deh aki lalu berandau enggau indai laban ti ka minta tulung apai (Aba) ngebak ke iya ba umai iya ari mua ke sepiak getah kami. Aku enda peduli ke iya laban ti majak ngadu ke lelabi aku nya tadi. Enda mukai-mukai dinga aku nyau kaong-kaong ga ukoi aku nya tadi nyalak, tak nan aja munyi. Kada enda nyalak jelu, pending ke aku ga ngiga dini endur nya. Munyi ke ari punjung madang getah, ko ati aku din.

“Nya nama utai salak ukai dek nya uchu?” ko apai Awa.
“Dek anang kin dek, engka nya landak kini” ko Indai (Mak) nagang aku ngabas kin takut ke nya landak.

“Makai apai, enggau kami duai makai” ko indai (Mak) mai aki makai.
“Enda ibuh meh endu, udah nyangkaung indai dek berapi tadi. Nya meh aku tu kili kin tadi ngambi daun bungkang. Mupuk aku, legi kin dulu seduai sebedau pulai ngambi salai ikan dilangkau aku din ulih aku ensana” piak ko aki apai Awa ngasuh kami dua indai ke langkau iya sebedau pulai, udahnya iya pan lalu mupuk.

“Mak..mak… kin tua aham, nama enda salak Kadoi kitainya” ko aku mai indai aku ngabas utai ke disalak ukoi kami ke diberi nama “kadoi”.

“Ehh..makai dulu beguai ke tua muat. Takut ke ari tu ujan, nadai kena meli ke dek baju sekul, kasut sekul ila” ko indai ga nyaut.

Arap endar ga anak ati, nya ti ngasuh ransing amat enggau indai aku muat getah. Laban ti deka dikena meli ke aku pekakas kena sekula.
Kami duai pan lalu belabuh makai, belauk ke budu pari enggau buah terung iban. Aku laban ke enda milih nyau engkuam-engkuam, ngambi ke jampat agi tembu.

Sebedau belabuh muat, diak deh indai mesai enda ngasuh aku bejalai jauh laban diatu musim apai nyamun ko iya. Udahnya iya pan belabuh ga muat ngagai madang getah kami mua ke kanan sepiak jalai batang.

Dalam ati aku din, ti bisi apai nyamun pantap ga legi. Sambil megai duku candung aku ke enda bulih tiga jengkal. Laban bai ati ti deka nguji serta ka nemu nama utai disalak ukoi aku nya tadi, diak deh aku enda peduli ke jako tagang indai nya tadi. Nyau ga aku belanda-landa nuju ukoi aku ke nyalak, datai din peda aku nyau surut mansang Kadoi ke nyalak. Udah meh datai semak, peda aku tengiling. Iko iya agi ayan, tubuh iya udah tama lubang laban ti deka ngelari kediri meh nya kini. Legi dek ensepi, ko aku bejako kediri. Tu baru bisi tunu dirumah legi, nya baru sida ine enggai sida ibu bilik sepiak muji aku ti aku bulih tengiling tu legi piak ko ati din ga enggai enda ngiga diri dipuji. Diak deh lalu aku tarit iko tengiling nya, iya pan majak ga begelung. Kadoi nyau majak ga ngajak, aku bisi ga ati takut tang ka ngeleka sayau ke tengiling nya lepas. Sintak aku duku, pantap aku dipala enda ga tengiling nya ulih laban duku aku ke tumpul. Meda bakanya tadi lalu irit aku belanda tengiling nya tadi nengah madang getah nuju langkau. Datai din lalu aku segul ke dalam uyut, enda ga muat laban tengiling nya besai. Meda bakanya tadi lalu aku segul ke dalam bubu begulai enggau lelabi. Semadi umbas meh, nyau enda temu tungga aku iya ke deka ngelepas ke diri. Engka nya bela takut ke pangan diri kini seduai lelabi dalam bubu aku nya.

Enda lama peda aku ngemesul apai aku(Aba) datai. Engka iya baru nurun ari bukit pelaba aku. Laban ngelamatu iya bemalam din, benung ngaga jalai kampong din. Datai diak, apai lalu nyua ke bungkus plastic ngagai aku. Nama agi deh, berumban-rumban ga aku merunsai ke bungkus nya tadi laban sigi nemu nya kuih.

“Ngalu dek tadi aba?” ko aku nanya. Apai aku(Aba) mayuk aku, laban ti sigi arap ga iya meda aku, tang kadang-kadang suah ga aku di lunsin iya laban ti kelalu manchal.
“Au ngalu, dek enda enggau aku” ko apai aku(aba).
“Dek enda madah deh. Apu…peda dek utai ulih aku aba” ko aku nunjuk ke lelabi enggau tengiling.
“Ikan ukai nama enda bulih, ambis cuhi aki seberai nyin” ko aku nunjuk ke langkau aki apai Awa.
“Alah amat dek laban aki dek deh” ko apai aku(Aba) ketawa.
“Apu amat pama anak aku neh. Bulih tengiling, bulih lelabi nya baru ine dek gaga amat datai dirumah legi. Bai pulai dulu tu neh, datai rumah bai tunu aya dek apai Imah legi. Aku nyaup mak dek muat ai getah” ko aba ngasuh aku mupuk dulu.

Aku nama agi deh, sigi nya ke diati laban ka mandang ke diri bulih lelabi enggau tengiling. Lalu mupuk meh aku tu tadi ngejang ke langkau pulai ke rumah panjai.

Iya meh ba rantau jalai tadi, dia deh aku bepansa enggau apai Stin. Iya laban ti sigi udu nundi aku, madah ke lelabi ke dibai aku nya tadi lelabi tupi iya. Nya meh aku tu tadi pedis endar ga ati.

“Hei!!! Dek nya ..nadai apai tuai ohang ngemula-mula nya. Legi dek sepi dek” ko aku ga camang-camang nyintak duku.
“Anang baka nya Yai…ni nya nyau ka bepantap. Ti ukai enggi aku kada enda enggi aki dek Jugam nya deh” ko iya ga majak beduan aku.
“Ka iya!!! Ukai bisi tulis nama” ko aku ga nimbal laban sigi umbas iya ga anak penemu aku bejako.

Aku nyau enda beduli ke iya agi, lalu tanjun-tanjun naban ke bubu aku nya pulai. Datai dip ala tangga, aku lalu ngagau ke aya aku apai imah(Menyadi tui sida Indai aku).

“oo..aya!!!!OOOO..aya!!! Peda dek utai ulih aku!!!” ko aku ngangau.
Empai ga iya nyenguk, aya apai Daniel ke benung begaga ke rumah iya diak lalu nyengau.

“Nama utai ulih dek Yai?” ko iya nanya.
“Apu…lelabi enggau tengiling aya…tunu kitai tu ko aba tadi” piak ko aku nyaut.
‘Apu pama jamah dek neh Yai…bulih lelabi enggau tengiling” piak ko aya apai Daniel.
Nya meh kembai agi ga sai idung dipuji kumbai pama. Aku pan lalu niki ke tanju. Nya meh bala ke duduk ditanju bela ngelara magang, kelebih agi bala sida kebujang-bujang.
“Nya baru ka Ine Char ila, laban nemu ngiga lauk” ko Rawing nundi aku. Nyau engkakah gab ala ke bukai ketawa.
Pedis ati ke diri ditundi, lalu disintak aku duku lalu enda camang-camang biau kiba biau kanan. Nyau bekesebar ga sida lari, laban ke bedau nemu reti utai ngasuh pedis ga maia nya. Nyau belaie mata ngenat ke diri ka nyabak enggai dikumbai laki ine Char.

“Anang igat..anang “ ko ibu indai Imah ke baru pansut ari ruai seretai enggau ine.
“Lapa nya ka nganu orang bakanya” ko ine.
“Sida ga nundi aku deh!!!” ko aku nyaut, nyau beurat-urat rekong kerik-kerik bai ingat.

Enda lama udah nya aya apai Imah pan datai ga ditanju. Engka baru pulai ngambi kayu kini iya, nyau agi bedau abuk kayu ga tubuh tudah tuai.

“Ni ke bai dek tunu aku Igat. Besai, lapa enda dibantai ked deh?” ko aya ga nanya, diak deh iya lalu nilik bubu aku ke agi dileka aku ditanju laban ti nyau kiruh ka nganu sida ke nundi aku tadi.

“Aham meh tua, bai ke ujung bilik. Lelabi nya awak ke tupi ditanju tengah engka apai dek ka ngalau iya.” Ko aya apai Imah.
“Asuh iya pansuh tadi aya” keno ko aku ga ngelangkung.
“Bunuh dulu wat, legi aku mansuh iya’ ko Ine ngasuh aya mansuh iya.

Kami duai aya pan betunda udi ga ke ujung bilik. Datai din tadi aya pan lalu ngidup api, aku mina ngemata ke aja.

“Bidik endar ga anak bujang aku tu dek..dek..” ko ibu indai Imah ke pansut ari blik dapur murus-murus belakang aku. Iya endang sigi gauk amat ke aku, mentas amat laban aku ke enda nemu enggai ga diasuh iya.

“Tu ai dek Yai” ko Imah ke datai ari dapur mai segelas ai Bali. Apu..tu baru idup nyawa ko ati din, diau dirumah panjai tu benasib amat ngirup ai tu. Enggi kami laban apai(Aba) ke mengkang ke pasar enti iya nurun ari bukit, enda ga pungkang. Tang meh mengkang ai oren belama, enda nemu milih ai bukai sida.

“Ka nyadi bateri kita Yai, manah amat cerita Hindustan legi” ko Imah nanya ke penyadi bateri TV kami. Bateri lipan nya udah enda kena, bai apai aku pulai laban ulih di cas kena meda TV lebuh injin api ke enda dipasang.

“Ka nyadi” ko aku nyaut. Laban ke agi benung neguk ai bali nya tadi, sayau ketitik enggai ke naya.
“Neh Biai…dek enda mai aku dek tadi ngulih kelelabi nya” ko Chendang, menyadi sida Imah kelelaki.
Peda aku Chendang agi bekain mandi bepegai ke senapang ikan. Udah nya baru iya ngengkah ke beledi ke dibai iya, semak kami ke duduk ditanju.
Peda aku palau dua iko nyau ka mesai pun betis,undang bisi ga empat iko.

“Sapa enggau dek tadi endang?” ko Imah nanya.
“Kami duai,Budha ba pendai lubuk Bangas” ko Chendang nyaut.
“Udah bagi tadi?” ko Indai iya nanya.
“Udah” ko Chendang nyaut.
“Apu nyampau endar meh ulih seduai, enda bulih pengelama seduai ke nurun tadi” pia ko indai iya.

Aya apai Timah pan udah ga belabuh nunu tengiling. Lelabi udah ga diintu iya, angkat mansuh iya aja. Ine datai ari ruai mai daun bungkang kena mansuh lelabi, lalu madah ka bala sida ke ngalu ngambi anembiak sekula udah datai.
Aku nama agi deh, nyau ka tebeleka gelas ninga ine madah laban ti kelalu gagit. Nama agi deh, nyau belawa meh aku keruai laban ti gauk lama enda betemu enggau sida.

Datai din tadi peda bala sida bela bepinching ke bup ka duduk di ruai. Nyau nyimbing-nyimbing pejailai tudah aku nampil sida kiak. Mulut sida kutap-kutap nyebut utai dipeda sida diak, tang aku bengap-bengap ga enda nemu bagi utai ko sida. Dini ga nemu, lalu nadai kala megai pensil megai buku.

‘Apu akih..amai-amai kami sekul din. Maioh mat kaban” ko Siling nusoi diri maioh kaban din.
“Bisi nginti din Iling? Bisi pun kalapok?” piak ko aku ga deka nemu nama pengawa sida din.
“Adai din arr, sipat cigu ti dek enda mending. Enda tau lama mandi,pama pangkong orang loceng mesti nitih jam” ko tudah Siling ga madah.
“Bisi makai kuih kita din Iling” ka Tanya tudah aku ga.
“Tiap-tiap pagi, tiap ahi..bisi indai sekula empu” ko Siling ga madah baru.
“Indai sekula nya sapa deh Iling? Indai sapa nya?” ko tudah aku ga nyau bengap-bengap enda nemu sapa ke indai sekula.
“Ohang ke mehi makai meh nya” ko Atan nyaut.

Nyamai amat meh sekul deh. Nyau enda sabar ga asai ati ka meda utai ke dikumbai orang sekul.

“Uchai…makai dulu dek. Udah dek sipat ine uban legi” ko Linda anak menyadi Indai aku ari Jagau, bisi pulai ngagai kami maia lebuh iya ke cuti sekula.
“Empai ka ku. Agi kenyang” ko aku, enggai diasuh Linda makai.
“Apu dek, nganu indai ambu legi dek enda makai. Deh enda anjung orang sekul dek ila” ko iya ga majak ngasuh aku makai.
“Makin uhang madah enggai!!!” ko aku mutap.
“Puni legi” ko Linda.
“Eeee….enda nemu uhang enggai” ko aku ga, ka pan enda nyau ga mansang ke dapur laban ke takut ke diri puni.

Iya meh aku tama ke bilik peda aku bala sida petunggal aku benung bepeda ke jerita TV, nama agi deh iya ga benung bala Hindustan nya nepan gajah. Nyau enda ga datai didapur, lalu ga nuduk kediri enggau sida meds TV diak.

“Iya tu amat enda mending ke jako arr” ko Linda lalu musir pending aku, lalu tarit iya ke dapur.
“Akaiiii!!! Pedis amat.Au..au..au..” ko aku ensepi diri ditarit pending.

Udah nyungkit asi enggau nyengkau lauk, aku lalu naban ke pinggai ke ruang tamu laban ti ka enggau bala sida meda TV. Bala nyau maioh semaioh datai, sama deka enggau meda jerita TV. Enda lama udahnya peda datai ga indai Pumpek (Tili) mai bisi ke penuh laban pisang mata ke udah dikusi, lalu Jelik mai sambal lalu diduduk ke sedua ba tekang sida ke meda TV. Nya meh bala mensia bela beteripas bejengkau kebuah pisang mata enggau sambal. Nyau tachuh diri bilik endur mensia ke berara ke utai, bisi nya ngelara cerita TV, bisi nya ngelara madah ke sambal nya pedas.

“Apu maioh temuai tu neh” dinga aku apai(Aba) bejako ari belakang, baru datai seduai indai(Mak) ke nangkal.

“Udah mandi dek tadi angat, nama baka tanchut kena nangkal tadi nya?” ko indai(Mak) aku nanya meda aku benung enggau orang bepakai ke sambal.

“Empai, legi meh. Ka meda TV, benung makai meh tu” ko aku ga nunjuk ke asi aku ba pinggai ke ari tadi sigi enda kupir.

“Enggai iya nyadi pulai ari tanah lalu enda mandi. Ni tengiling dek tadi udah asuh dek tunu aya dek? Besai tadi angat?” ko indai aku(Mak) ga nanya.
“Bebesai ko dek mak. Nyau enda umbas tepu aku ba uyut ku tadi” ko aku ga nusi pemesai tengiling ke ulih aku tadi. Baka ke dipadah, peda junok-junok ga tudah aya apai Imah mai tengiling enggau lelabi tama ke bilik.

“Tu tengiling udah tunu aku tu tadi. Keduak nya engka kita ka mansuh iya, lelabi udah dipansuh indai tadi” ko aya apai Imah madah ke indai aku(Mak).

“Endai udah bagi tadi?” ko indai(Mak) nanya.
“Nadai nya kiruh dibagi deh. Sama bela makai begelumu ditu ga legi kitai tiga pintu tu. Nyamai agi ga makai beserumpo” ko aya apai Imah.

“Piak tau meh” ko indai aku(Mak) nyaut aya.

Iya meh kira penumbas iya, kami sebilik pan belabuh ga berenah makai. Nya meh nyau baka bala pengabang nya laban sida aya enggau ibu aku dua pintu sama bela enggau begelumu makai diak. Nama agi deh, tachuh bala mensia belauk lelabi enggau tengiling. Tambah mega salai ikan ke diberi aki apai Awa bisi ga dibantai ke indai aku(Mak).



*** Sekula

Nyau kira dalam taun 1990, umur aku pan nyau ga manggai 7 taun. Gari sekula, kasut,tanchut enggau macam agi pekakas kena besekula udah ga sedia. Nama aku udah ga diregister sida indai ba sekula Machan, mina ke nganti ari maia nurun aja.

Lemai nya tadi indai aku(Mak) nyau kisuk nyendia ke perengka ka dibai aku bemalam disekula. Baka gari,pinggai,sudu,kibung,tilam enggau maioh agi perengka bukai. Aku endang nama disebut agi, ukai main pengandal ati laban ti deka besekula. Ka pandai, ka kereja perintah ngambi ke bisi kelita baka bala petunggal aku bilik sepiak sida Remang,Sida Chuat,Sida Tingai enggau sida Baling. Nyamai amat ga pengidup sida laban ke udah meruan gawa, bisi kelita bisi duit ko anak ati din ga berunding. Nadai juluk ati bukai ti bisi kelita ila puas ngalu ke pasar sibu, enda baka diatu setaun ambis ngalu kin dua tiga kali kini.

Iya meh lemai, sida ine enggau indai aku pan lalu mantai ke utai kena bedara ke aku ti deka nurun besekula pagila, laban kami ke sigi agi ngena adat lama.

“Manuk diujung bilik ambi dek angat kena bebiau” ko apai aku ngasuh ngambi manuk laki kami ke sigi udah ditambat iya ditengah laman ujung bilik. Nyau ga tudah aku ngambi manuk ke diasuh iya nya tadi,sigi rajin diasuh orang laban bai ati ti kelalu gagit.

Kira udah meh utai sedia magang diak deh aki aku (Asing) lalu diasuh sida bebiau, laban ke landik serta sigi pengawa iya ga nya lebuh maia orang ke begawai. Tembu bebiau nya tadi manuk lalu disayat udah nya bulu iya dicabut unsut enggau dah kena genselan perengka sekula enggau jari kanan aku nitih ke adat selama meh nya.

“Nya badu manchal kitai ka besekula. Anang udu memain diau dili din, bisi ahi tangkap penyamun ti udu bejalai sebelah pasar” piak ko bala ke duak ga nibar ke jako ajar ngagai tudah aku, ke mina peli-peli duduk ngimbai aya aku apai Imah. Bala pan mupuk ga besadung ka utai diempa ke bisi dibantai, enda ditinggal mega sida tuak endang sigi ai irup lebuh maia orang ti bisi bedara tauka miring.

Ari siti…..
Aku, apai enggau indai serta aya aku Isau nyau beidun-idun ga kesula nanga Machan. Laban ti ngerumban ka ngambu nalan lalu ngiga nyemari endur engka gari aku. Aya aku Isau agi berajar dalam darjah 6, kira setaun aja meh iya begulai enggau aku disekula Machan maianya. Iya ti dikarap ke apai enggau indai aku nyaga serta nemata ke aku ti baru masuk besekula pameri satu.
Iya meh ngalih ke lemai, maioh gab ala bakih ke sama baru masuk besekula peda aku. Betanya piak bela nadai ngelala pangan diri, bekaban piak aja meh laban bai ati ke manchal.

Iya meh ari nyau ngalih malam, dia deh ati tak nyau bebali. Ukai nya kala jauh ari sida indai,sida ine enggau kami sebilik ngelamatu. Nyau berasai enda betah, nyau seilu-ilu ga. Pengeran ke nurun ari rumah deka besekula nyau nadai agi, tang meh betukar nyadi beraie ngenang rumah panjai. Nyau kisik-kisik ga nyabak semalam-malam…..

Pagi siti iya meh loceng bemunyi….diak deh aku lalu terdani ga…
Kini meh orang tu deh, ko ati aku din meda bala anembiak ke sama enggau aku ba asrama nya nyau angkat magang-magang nurun. Aku pan lalu angkat ga, peda aku Isau bisi datai kiak ga.

“Aham tua.. ngumpul uras orang setengah jam aja” ko iya madah ke aku.
“Uras nama nya?” ko aku.
“Bisi orang madah datai din legi deh, berintai dulu ba mua asrama B” ko Isau.
Kami duai pan sama bejalai nuju alai orang ke sigi udah maioh ga berintai diak. Lelaki enggau indu sama berintai diak, peda aku bisi dua iko pengajar bediri diluan. Nama meh pengawa tu legi deh, ko ati aku din nanya diri empu.

Iya meh kira pukul enam setengah baru kami badu kerja, lalu dibai Isau mandi ke pendai. Iya madah enda tau lama mandi laban pukul tujuh orang belabuh ngirup, bisi kuih beri orang. Agi pan ai dalam ukai baka ai latong ko iya madah ke aku.

Iya meh udah datai di dewan makai, peda aku maioh amat ga bala anembiak keserebak enggau aku udah berintai deka ngambi ai enggau kuih.
Sida bepinching ke cup, bisi keduak nya besai enggau enggi keduak nya mit. Enggi aku cup pandak tang besai bisi tangkup,endang sigi selalu kena ngirup ai kopi dirumah.

Udah meh tembu ngirup, nya baru Isau nganjung aku ngagai kelas satu Merah. Datai din aku lalu ngiga endur kosong seninjik bendar ga sepiak Nancy anembiak indu kami serumah, anak petunggal aku lalu nuduk kediri diak, macam ga ragam anembiak maianya. Bisi keduak nya rangap-rangap bepeda pangan diri laban ke empai ngelala, bisi nya agi diluar kelas singut-singut enggai sekula. Aku bisi ga ati enda betah tang meh nyau memalu ga nyabak meda orang ngemaioh nya tambah mega bala orang indu bisi meda.

Enda lama udah nya, Cikgu pan lalu tama kelas. Cikgu nya besai tinggi,burak pan umbas iya. Iya ngasuh kami semua bediri’ lalu ngasuh nyebut selamat pagi cikgu enda iya tama.

“Bediri semua… Enti cikgu tama kelas kita mesti ka bediri lalu meri selamat pagi cikgu” ko iya nerang ke dalam jako iban.
“Selamat pagi cikgu” ko bala kami sekelas ga seretai. Bisi meh keduak nya mina mulut aja ke kimut-kimut tang jako enda pansut. Cikgu lalu madah saritu ari semua kami deka bekelala enggau pangan diri.

“Nyadi kita nunda cara aku legi neh. Kena kitai bekelala enggau pangan diri dulu ko iya. Nyadi nama aku Cikgu Ngilah, aku meh nyadi guru kelas kita satu merah tu ila.” Ko iya nerang kenama enggau pengawa diri.

Udahnya iya lalu ngasuh kami siko-siko bediri madah kenama enggau penatai diri. Diak deh siko-siko meh kami bediri lalu nyebut utai ke dipadah ke iya nya tadi. Bisi meh nya lancer nyebut, bisi ga keduak menik-menik aja laban ti takut bejako ba mua maioh engka malu kini nya. Enggi aku laban ke lasak-lasak nadai penanggur ga madah ke nama diri serta datai ari Ulu Latong.

Iya meh rehat pukul sepuluh, peda aku datai ga indai aku (Mak) enggau Linda ngundang aku ke sekula. Laban ti baru terubah aku renggang ari sida nyangka nya iya agi enda entu betah ngeleka ke aku diau kediri disekula. Aku pan piak ga nadai utai ngaga nya. Datai ba endur seduai ke nganti peda aku bungkus kuih bai indai aku(Mak) bisi meniga iti. Aku nama agi deh, lalu empai disua udah dirampas.

“Bagi enggau aya dek Isau kuih nya” ko indai aku(Mak) madah ngasuh magi. Baka ke dipadah Isau junok-junok ga datai ari belakang aku meda indai aku enggau Linda bisi. Kami duai pan sama bepakai ke roti ke dibai indai aku nya tadi.

“Mak..aku enggau pulai legi au… Enda nyamai diau ditu” ko aku madah ke ati diri.
“Ohhh..dini nya baru nurun udah ka pulai” ko Linda nyaut.
“Uji dek ga tinggal ditu..ukai nya nyamai ko dek” ko aku ga eggai disakal petunggal aku penemu.
“Ditu nyamai agi, maioh kaban” ko iya.
Indai aku enda nyaut, laban iya nemu aku sigi enda betah tang meh ka nurun ngelamatu laban ke empai kala ngasai diri diau disekula nyau asai ke deka ga ati sebedau nurun.
“Anang enggau pulai anak, ari lima tua aba dek ngabas dek baru ga. Nganu cikgu legi ti dek nyau pulai, enggai sida ngasuh sekul baru ila. Enda pandai nama penyadi, nyau baka apai pantan dek ila” piak ko indai aku(Mak) besema ke aki apai Pantan nyau ke munyi siko aki nya aja ke nadai sekula kami serumah ga.
“Berajar pandai-pandai baka sida apai Isac sida baling, ila besai ulih meli kelita” ko indai aku ngasuh bechuan ke sida petunggal aku ke udah mujur dalam sekula. Apai Isac tu ngajar ba sekula nanga Machan ke alai aku berajar lalu Baling tauka tamang aku Stanley Beti tu benung kursus nyadi cikgu, seduai tu anak menyadi indai aku.

Iya meh indai aku enggau Linda ngelebus nyau sikok-sikok ga tudah aku nyabak enda betah, enda sedar ke cikgu kelas aku ngemata ke ari luar kelas kami. Udahnya tadi aku lalu begadai-gadai ga mansang ke kelas nyau baka ke enggai. Diak deh cikgu madah anang nyabak, udah teba ila badu agi enda betah keno ko iya.
Ari beganti ari, tudah aku nyau ga maioh orang dikelala, maioh bakih nyau tumbuh bulu siga. Nama agi deh, nyau nadai meh ngenati ke rumah agi laban ti majak rindang. Iya ga lemai-lemai ari ulih ga enggau orang bemain bol ba padang sekula.

Iya meh udah genap dua minggu, nya baru kami cuti enda lama. Apai aku(Aba) udah sedia nganti dipasar laban ke ngambi bala kami ke pulai sekula. Datai dirumah ukai main agi ga tudah aku ke betusi ke jerita ngagai sida ine,sida ibu enggau aya aku. Sida ngumba bendar ga, nemu amat ga ngelulu ke tudah aku, dini ga ati enda ransing agi ga nusi jerita. Ari minggu nurun ga ke sekula baru, sigi mesti ga mai bekal asi balut enggau daun biru serta lauk sigi enda nemu pungkang laban apai aku(Aba) endang semampai bulih jelu enggau babi. Datai disekul legi sigi bebala kami makai ba asrama, macam-macam lauk.

Iya meh ari enam minggu enda pulai, peda datai ga ibu indai Daud (Sari) seduai aya apai Daud. Laban seduai ngabas Daud ke sama enggau kami besekula diak. Laban keteleba amat, sigi mengkang bekuli ba indai aku enggau begumpur ke buah lada, nupi lada, ngetau serta maioh kerja agi ba kami enda nemu enda iya ngiga aku. Piak mega sida indai ari rumah, enti enda undor ngabas aku sigi bisi ga ngirum anak belanja serta bekal (asi enggau lauk). Nyadi kami serumah ke sama enggau aku besekula di nanga Machan maianya (Lawrence Janggu)Atan, (Raymond Wong)Siling,Alice)Jelik,Daud,(Tutefaluna)Tipa primary tiga,Isau,(Lily) Shima primary enam, semua sida tu tuai ari aku magang, lalu ke serambau enggau aku Nancy enggau (Gelingie(Ingu) kami tiga bela primary satu.

Nyau bisi empat bulan udah masuk primary satu diak deh, datai ga maia kami peresa. Tudah aku laban ke sigi baru nemu utai ke buku, dini nya bisi tadika bekelansai bakanya meh ngaga. Baik ga enggi aku enggi tudah Anai balat agi ga bangat enda nemu sekali-kali. Iya meh pansut pemutus diak cikgu lalu nyua ke kami buku ti dikumbai “report card”. Nyadi pemutus iya, aku bulih lumor dua nangkan Nancy kami serumah. Nya meh lebuh ke pulai madah ke sida indai bulih lumor dua. Arap endar ga sida aya ditusi ke aku lumor aku peresa. Udah nya tadi ke sekali peresa baru laban ti mina dua kali aja peresa setaun, aku bulih lumor satu.

Beduduk ari primary satu aku bulih nombor satu enggau dua sampai ke aku primary lima. Nadai kala duduk ba lumor bukai sigi lumor satu enggau lumor dua. Ba sekula mega aku enggau orang masuk kelab, baka pengakap, main bol enggau maioh bengkah agi. Nyau datai ga maia aku masuk ngagai primary enam, taun ke penudi iya aku besekula ba SRK nanga Machan. Piak mega taun nya aku bisi peresa ke dikumbai orang “Ujian Penilaian Sekolah Rendah” UPSR. Nyau puas meh bala apai indai serta bala cikgu meri jako peransang ngasak ngasuh berajar bebendar ke agi.

Dalam ati aku din, udah bisi ga pengerindu deka masuk ngagai sekula secondary @ menengah. Ba pelilih menua kami bisi dua iti sekula menengah iya nya di Kanowit, sedaya enggau di Durin. Ti nitih ke ko jako sida apai sigi enda ngasuh di Durin laban lawit, sigi di Kanowit meh asuh sida.
Iya meh datai maia enggau ngelebus peresa, diak deh pemutus peresa aku enda entu ngemuas ke ati apai (Aba) enggau(Mak). Nyadi pemutus peresa aku enda ga dikumbai jai, tang seduai enda ngadang aku bulih bakanya laban ngelamatu pemutus peresa dalam semua mata pelajar endang sigi cukup manah. Seduai cukup ringat, tang kati ko enggau utai udah ngelebus.

***Sekula Menengah

Nitih ke atur sekula aku diasuh sida berlajar di SMK Durin, tang apai(Aba) enda setuju lalu minta ke aku berajar ba SMK Kanowit tauka Sedaya. Udah nya datai pemutus ari opis pelajar, aku bulih di SMK Sedaya laban di Kanowit udah penuh. Udah meh tu ila ko ati aku din, baka terubah aku masuk primary satu suba. Nadai siko orang dikelala, laban din geturung orang ari ngemah, Tada,Pedai,Bawan,Ngungun,Poi enggau Jagau. Tang ka pan enda nitih aja ga jako sida apai(Aba).

Ari keterubah aku masuk sekula, apai ngajung aku ngerejister nama. Datai aku di asrama peda aku nyau besai-besai bala anembiak ni enda deh sida ke pom tiga,empat enggau lima nyau udah bujang. Iya ga nadai dikelala aku Seiko-iko, ah idai merinsa udu ga aku tu nadai kaban legi ko ati aku din.
sebedau pulai apai(Aba) sempat mekal aku enggau jako.

“Anggat. Dek sekula ditu ibun enggau likun ke pendiau diri. Anang enggau orang nginsap, anang ngelaban jako pengajar anang maioh macam. Pajak ke berajar aja. Iya tusah amat dek ngidup ke diri ila ti dek nadai pemandai. Iya aku nganu aku enti dek maioh ulah” ko iya nibar ke jako ajar.

“Au” ko aku ga enda nemu nama saut bukai agi.
“Ari lima ti cikgu enda ngasuh pulai, anang pulai. Ila mak dek ngabs dek kitu ga ari minggu” ko iya,madah ke aku.

Diak deh sebedau meleka iya lalu nyua ke aku duit, lima puluh ringgit ke belanja aku. Apu, ko ati aku din maioh amat deh duit tu. Iya kemaia ga aku kala megai duit ngenyampau tu. Aku nyimpan duit nya teguh ba kerepai chap “Alien” enggau teguh enggai ke teberayan.

Pulai aku ke asrama alai aku nyimpan gari aku tadi, peda aku bala anembiak diak ka endar ga merening aku. Aku nyau cengih-cengih, ka ngelara malu ga, takut mega diak laban diri ke siko aja.

“Sapa nama dek akih?” ko anembiak siko nanya aku, iya lalu mansang duduk ngimbai laci aku.
“Stanley” ko aku nyaut iya.
“ Aku Stanley meh”ko iya madah ke diri setamang enggau nama aku.
“Aku sepiak dek tu.” Ko iya nunjuk ke laci iya sepiak laci aku.
“Au. Baru masuk ditu dek?” ko aku nany iya.
“Enda, aku pom dua” ko iya nyaut aku, retinya taun kedua meh iya udah besekula ditu ko ati aku din.

Arinya tadi kami duai pan lalu bekaban, begulai kin kiak. Laban aku ti madah kediri mina siko aja ari Machan. Diak deh aku nemu asal iya tu tadi ari nanga Ngungun pegai menua ngemah. Iya pan lalu mai aku bejalai meling sekula Sedaya, serta nunjuk ke aku macam-macam endur.

Udah meh tembu makai lemai diak deh Stanley nganjung aku ngagai kelas pom satu F, mai aku nemu laban cikgu bisi madah lebuh maia aku ti register tadi.

“Tu kelas dek meh tu akih. Aku sepiak nya” ko iya nunjuk ke kelas iya takah siti blok ari kelas ke endur aku nya.
“Legi ambis berajar malam aku nganti dek diak” ko iya lalu mulai ke diri ngagai kelas iya.

Dalam ati aku nyau ketap-ketap ga ka tamak, laban orang udah maioh amat didalam. Tambah mega nyau besai-besai, indu dara bebajik peda mata. Malu ga ati ka tama, tang kati ko enggau lambat laun sigi diak meh endur aku. Begadai-gadai tudah aku ngiga meja puang.

“Ditu akih” ko orang ngangau ke aku. Peda aku anembiak lelaki ngepai aku mai duduk sepiak iya. Aku pan lalu nuju ngagai iya kiak laban seninjik ga bisi penuduk puang diak. Iya madah ke nama diri Joseph datai ari sekula Jagau. Aku nanya iya ngelala ke enda iya sida ibuk aku din, lalu padah ke aku nama. Iya madah sida iya serumah nya, aya aku tuai rumah sida ko iya.

Nama agi deh, udah dua ga kaban aku. Ari ke sunyi kelas nyau bisi tengap mensia ke betanya ke penatai diri. Bisi ga siko dua ke belabuh betundi ke pangan diri. Aku laban ke agi bedau malu-malu tekuyung, agi empai entu teleba mina tuchum-tuchum aja meh. Sekumbang ke bejalai lemai tadi, maioh amat ga indu bebajik ko anak ati din nyaut bisi endar endur ngait ke ati.

Ari beganti minggu, minggu beganti bulan pemujur ba sekula aku endang sigi bisi manah. Ninting peresa aku endang sigi duduk ba nombor satu enggau dua belama, markah pan manah ga. Nya meh cikgu Melayu ari semenanjung ke ngajar kami arap amat ke aku, tambah mega aku ketuai kelas kami.

Tatau & Manchal

Laban bai umur ti nyau majak meningkat tadi, ati pan bisi ga pengerindu deka enggau orang bepangan. Laban nyau ninting lemai ke meda bala kaban aku keduak betawing-tawing ga enggau pangan sida. Ngelamatu ukai nadai orang nganjung surat, madah ke diri minat keduak nya terang-terang kirim salam tang meh agi jual mahal.

“Pit wett…salam ngagai laki nya” ko indu siko ari dalam kelas dua G lebuh aku enggau bala kaban aku ti mansa.

“Dek ko indu nya Ley” ko sida madah ka aku indu nya salam ngagai aku. Ah idai, berani amai ga iya neh. Awak ke dulu meh, ko ati aku din ga apin berani beterus terang.

“Ngumba kediri dek wai-wai” ko munyi kangau orang indu ga lebuh kami mansa belakang kelas sida. Naka meh ati din ka madah ke iya, tang meh agi ga ulih laban ti empai teleba.

Iya meh kira nyau deka gawai, diak deh aku bulih pangan keterubah. Siko indu ti bajik asal ari Bawan kanowit B.. nama iya, indu kelas sepiak kami sama pom satu.Nyau ke puas betemu berandau, piak mega bekirum surat taja pan sepiak kelas. Aku nyau majak ga nemu enggau orang bepangan nyentuk ke sampai tahap kelalu nemu. Maia ke lepa tinggal pangan aku ari Bawan tu pulai ke rumah ujung minggu diak deh aku bulih ga pangan indu siko agi asal ari Lukut V.. nama iya, lalu udahnya siko indu pom dua ari Ngemah Melanie nama iya. Mulut madah sayau ati din majak ka ngiga baru, indu nyau majak bajik sebajik. Iya ga surat majak ga datai ari orang indu madah kediri rindu, madah kediri minat bisi nya lalu mai bepangan.

Nyau kelama udah nya nemu meh tudah B.. tu tadi aku ti maioh sulu, nama agi deh ringat meh orang. Lembau macha surat ke ditulis iya maianya, mungkang tak madah nyesal ngelala aku. Nya iya bulih, ni enda “bahaya agi baya pantai ti dibanding ka enggau baya ai” keno ko iya. Nadai utai ngemedis nya ati kumbai indu baya.

“Lapa dek tak nyida akih?” ko tudah Lawrence nanya meda aku tak mukut pintu bai ati ringat meh nya.
“Dini enda pedis ati, kumbai orang indu baya deh” ko tudah aku ga.
“Badu enda meh, nuan ga maioh pangan” ko iya ga nyaut ngasuh aku pedis agi ga ati.
“Dek anang memacam dek” ko aku ga, ngaga diri ngedal ke lengan ka mukut iya.
“Ley tu surat dek beri sano tadi” ko Liam datai nyua ke surat ke disimpan dalam karung surat biru.
“Sapa meri?” ko aku, ka nemu surat sapanya.
“Baca dulu meh” ko iya enggai kiruh nusi ke aku.

Diak deh kami tiga lalu duduk ga ba katil aku macha surat nya. Nadai ga nya utai dipelalai laban ke sigi selalu bekungsi bebacha ke surat. Aku laban ke landik nulis surat suah amat diasuh bala kaban nulis ke sida. Nyadi bakatu ko munyi leka surat nya, dalam jako laut.

...................
Kehadapan saudara Stanley,

Maafkan saya kiranya kehadiran surat ku ini mengganggu saudara disaat dan tika ini.

Telah lama ku memendam rasa terhadap saudara, tetapi bila kita bersua tak terungkap oleh ku untuk menyatakan hasrat dihati ini. Lantas ko coretkan di lambaran ini, agar bisa saudara mengerti akan erti cinta ini.

Sebelum mengakhiri surat ku ini, kususun jari sepuluh andai kata ketenangan saudara terganggu dengan kehadiran lembaran ini.

Salam yang teramat sangat..


Dariku,

Evylyn…


Pia keno ko munyi surat tu tadi. Seduai iya lalu ketawa udah tembu kami tiga macha surat nya tadi.

“Nemu aku indu tu.” Ko Lawrence madah ke diri ngelala pengudah macha surat nya.

“Sapa ko dek deh?” ko aku nguji iya.
“Sano nya arr” ko iya nyebut siko indu ari Rantau Kemiding. Indu tu sekula ba SMK Kanowit, betemu lebuh maia kami ke selalu begulai berlatih Teakwondo.
Terima aja meh ko aku ga dalam ati din, ngambi ke bisi ga enggai besulu lebuh maia ke rembus sebelah pasar kanowit ila. Nama agi deh lalu belabuh ga bepangan enggau indu nya deh.

Apus taun masuk ga aku ngagai pom dua, baka pelajar aku endang sigi agi nyulut. Nadai endur mantah endang sigi ba tangga satu, perangai pan nyau ga makin machal. Lebih-lebih agi maia pulai ari lima enda nemu enda laun, laban ke tembu betemu enggau indu dulu. Dini enda muchau sida ke ngambi kami pulai sekula ke nanga Machan. Tang suah agi ke nengah jalai kem batang nya pulai kerumah panjai kin. Nyamai bendar ga diak ti lebuh bisi sida ke niki kebukit, lalu datai ba pala tangga alai sangkai.

Lebuh maia ke pulai ke rumah sigi beambi ke kayu meh kereja aku. Piak ke enggau indai aku nangkal getah kami di Semawang, enda jauh ari rumah panjai. Apai aku(Aba) nadai di menua laban ti kereja batang ke menua jauh, ine kami pan enda ga entu dapat laban iya ke nyau enda meda.Sida aya aku apai Imah enggau indai Imah nyau ga nitih ke bala anak iya kereja ke semenanjung din. Rumah panjai nyau majak puang, aya apai Daniel kereja ga di Sibu. Bala rumah panjai setak ili pan maioh ga udah ngejang ke rumah laban ti nitih ke pengawa, gawa sebelah Johor enggau maioh agi endur bukai. Bala anembiak nyau ambis sekula, iya ke pansut sekula nyau ga bekereja sebelah negeri.

Nyau berasai amat ga insur iya diau dirumah panjai sepi aku, nginti nyau ga ke diri-diri. Bala kaban aku, Siling nyau ga besekula di Selirik Kapit, Atan nyau ga nitih ke indai iya ke Miri lalu tudah Daud nyau ga dibai apai iya pulai ke menua asal iya pengudah indai iya ke nadai. Aya Isau nyau ga kereja di Miri,sida Joe,Rawing semua gawa di negeri magang amat nyau seilu-ilu ga asai iya. Pendai pan sunyi belama meh nyau enda baka suba, sema bisi pan bala anak mit rebak sida menyadi aku. Nya meh ati mengkang ka pulai ke asrama belama-lama, laban din nyamai mengkang bisi utai merindang. Tambah mega maioh main,maioh bakih enda kurang mega bisi sulu ga enggau merindang ati.

Bisi sekali lebuh kami benung main bol laban pendidikan Jasmani tauka PJK, aku meda siko indu bajik amat mansa dipeda mata aku. Aku nanya kaban aku ke semak aku diak.

“ Ibin…ngelala dek indu nyin?” ko aku nanya ke nama indu nya tadi.
“Ni iya?” ko Ibin…
“Au…indu nyin, Lee Ting nama iya indu Cina sengayan” nya ko iya.
“Nama deh? Minat kah? Ceh… lain playboy” ko Stephen ga ngumbai aku pengindu. Aku enda enda kiruh ngemana ke jako Stephen nya tadi, tang meh majak berunding ke indu cina nyin tadi.

Enda lama peda aku pansut iya ari opis pengajar, engka ka pulai ke kelas.
Seninjik bender ga buah bol ke ditendang sida tadi bebelat ari mua iya ke bejalai. Nama agi deh, nya meh peluang aku ka meda iya semak. Lalu belanda-landa ngagai buah bol nya tadi. Udah ngambi buah bol nya tadi kira, semester setengah meh ari ya.

“Hai” ko aku ga negi ke jari kira ke mai bekelala meh nya. Tang indu nya munyi ko laut “buat der jak”. Apu neh, sombong amat indu tu ko dalam ati aku bejako kediri.
“Woi!!! Bai kitu ke bol nya arrr” ko sida ari dalam padang ngasuh nikau ke bol ngagai sida. Aku laban tebelenga laban indu cina nya tadi nyau telunga-lunga ga enda berate ke diri agi megai buah bol. Iya meh udah ambis kelas PJ tadi pulai kami ke kelas, diak deh aku nanya bala indu kami sekelas sama ada ngelala indu cina ke dipeda aku ba padang tadi. Kedua madah ngelala, laban bisi kaban iya. Serta keduak nya sengaja ga enggai madah, dini ka tudah deh iya ga bisi ati maianya.

Nyau kelama udahnya, kirum ke aku surat ga iya. Tu meh terubah iya aku dulu nguntik indu mai bepangan enggau nulis surat. Asuh aku anjung kaban aku, nadai ga bisi dibalas iya. Amat liat indu tu neh, ko ati aku din. Udah nya tadi puas aku berunding bakani meh cara ka ngulih ke indu tu deh. Nyadi maia nya aku bisi kaban lelaki siko anak penakan cina. Nyadi madi indu iya bakih enggau Lee Ting tu tadi, bisi ga kala nusi pasal pengawa aku ti ka nguntik iya.

“Ehemmm…pama jamah dek akih, alu indu cina ka satup dek neh” ka Boniface nundi aku. Boniface tu kaban rapat aku,sama kelas. Iya ninga tusi Chai Choo Ming @ Among kaban aku ke penakan cina.
“Anang tusah kaban, pagila ari pengada aku, iya ga ari enam tentu iya bisi datai enggau madi aku” ko Among madah ke aku. Iya madah diri bisi ngasuh madi iya mai Lee Ting lalu ngasuh aku ngambi peluang nya bekelala enggau iya.

Iya meh ari siti, maia ari pengada Among peda aku nyampau diri ga bala indu cina bisi datai nyau bebajik. Ahh idai enda patut ga aku tu bangat end ate ulih ke dek nya, ko ati aku din. Ti bangat enda ulih tau tukar meh nama aku ila.

“Hai” ko aku ngembing-ngembing Lee Ting ke benung nyengkau mee hun, seninjik bendar ga dibelakang sekali. Tang taja piak, enda kurang ga mata ti enchuri meda kami duai dibelakang.

“Oh…ye hai” ko iya ga nyaut aku, lalu tuchum. Tekenyit ga aku meda iya tuchum, meda sarinya malik pan enggai.
“Nyah tu enggi dek, tau ke enda dek makai tu…” ko iya lalu nyua ke aku pingai mee hun ke udah di kauk iya,bajik endar ga gamar iya bai iya senyum ti ngasuh aku nyau majak geram. Aku nama agi deh, enti ulih empai enggau pinggan sigi telan tekalanya empa pengaga di layan iya bakanya. Arinya tadi aku lalu betawing enggau iya sampai ke bala nyau majak pulai. Kami duai berandau tentang mauioh macam pekara, enggi aku endang sigi nginti aja.

Sebedau meleka agi dikingat ke aku jako iya siti.

“Ley, lama aku udah ngelala dek. Aku pan bisi ati ga ngelamatu, tang aku meda indu kami sekelas bisi minat dek nya aku takut. Agi pan orang madah dek maioh pangan” ko iya nyebut ngagai aku.

Nyadi ko timbal aku, “ anang pecaya ke jako orang. Ti dek enda pecaya, tau uji meh..nguji bepangan enggau aku” empai kala-kala ga aku ti aku ngenang tau tak ngasuh indu nguji bepangan enggau tudah diri.

Pemulai arinya tadi, nemu meh pangan aku ke ari lukut diak iya ngasuh aku milih iya tauka indu cina nya. Nama agi aku deh, azam baru, Lee Ting nya meh pilih aku.

***Kong Lee Ting

Ari beganti minggu, minggu beganti bulan tang meh pengerindu aku enggau Lee Ting makin makin bertambah, makin beraie lalu makin nyadi. Penyakit gila aku makin kurang, engka laban ngena ba ati meh nya kini. Berajar kami duai suah begulai, betundi begagai enda ibuh ditusi pengawa bukai. Gari sigi nadai kala masu aku udah nya, sigi iya belama. Ujung minggu pan nyau bela sama jarang ga pulai.

Amat dianti-anti ke ujung minggu laban ti deka betemu begulai enggau pangan diri, tang meh nadai kala sekali-kali ninggal ke buku. Takut ga maianya, takut kelalu kediri enggai ke ditangkap warden. Pecuma ngapa kena gantung sekula dua minggu naka meh pemalu, ko anak ati din. Ari ke bepangan enggau Lee Ting diak aku maioh ga teleba enggau bala indu Cina bukai baka Sida Voon Chin Yee, Chia Ming Choo enggau maioh agi. Diak deh siko agi ga kaban aku sangkut enggau Voon Chin Yee.

Iya meh sebulan sebedau ujung taun nyau berat endar ga asai ati. Laban cuti panjai sigi ngadang diri lama enda bepeda ila.
“ Ley, enda betah amai ku ila ujung taun tu” keno ko iya madah ke aku.
“Iya ga lama amai ga cuti, agi pan aku ujung taun tu bai madi aku ka Miri nulung iya jaga kedai” ko Lee Ting, piak jari iya megai tunjuk jari kiba aku.

“Lama nuan din? Kedai nama enggi madi dek din?” ko aku ga nanya ka nemu.
“Engka sampai ambis cuti pelaba aku. Iya bisi kedai makai din enda jauh ari Boulivard, iya mai aku din nulung iya” ko Lee Ting madah baru.

Aku enda memunyi aja, nama daya ukai nya ka nyadi ditagang.
“Tang nadai ngawa, dek tau call aku ila. Ila aku meri dek nombor tel aku din” ko iya madah kediri deka meri aku lumor telefon iya din.

Iya meh datai ujung taun, nama agi deh beserara meh meh aku enggau iya laban ti enda sama menua. Ari Sedaya iya diambi apai iya ngena Motor air, aku ngelayang ke pasar kanowit ngena Motor tambang (Pasin).

Datai dipasar Kanowit, nama agi deh. Segau-segau meh sebelah pasar betawing enggau bala kaban ari Machan ke sekula di SMK Kanowit baka sida Paran, Leo,Lobo enggau Sida Iky. Leka ke beg ba stesen bas, sigi lalu nyau meh niki ke snooker. Seari-ari nyuluk buah ranggir diak, dini nya bisi nyengala menang.

Pulai sigi bedarat ga ari kem batang ngagai rumah panjai kami, laban orang ke ngambi anembiak sekula udah pulai.


***Cuti Ujung Taun Pom Dua 1997

Lebuh maia ti pulai kerumah panjai cuti ujung taun pun dua berasai ga pemuang ba ati din. Tang mai enda berasai laban ke nyau nemu masang motor ai 15 kuasa kuda, enda ngetu bekulu kili laban ke beranjung ke orang , kami sebilik empu meh nya. Apai aku(Aba) bisi ga dimenua cuti, tang meh nganti ke deka nurun keluar negeri meh nya. Rumah panjai majak nadai orang laban ti maioh udah pindah kili serta nitih ke bala anak bekereja di negeri. Diak deh apai aku madah mai kami sebilik sama pindah nyewa di Nanga Machan sementara iya ti bekereja dimenua orang.

“Nadai kita ulih diau dirumah panjai ditu. Ti lebuh maia pedera renga nadai orang ngajung, agi pan jauh ari sepital” piak ko iya madah.
“Manah kitai nyewa di nanga Machan, nganti aku ke bekereja.Agi pan kitai bisi ngibun orang tuai” Ko apai aku(Aba) nyebut madah ke tuju ati diri.

Apin lama ga iya udah madah munyinya, kira seminggu meh udahnya diak deh kami sebilik nyau ga mupuk pindah ke nanga Machan, nyewa ba ex-camp budak Scout suba.

Nama deh, bebas meh aku nyau mangkang pasal. Nyau tiap ari ga ke pasar lepak enggau bala kaban, iya meh lemai main bol gab a padang sekula nanga Machan.

Dalam kandang ke cuti nya bisi ga sekali sekala aku ke talipon ngagai sulu aku indu Cina. Tang meh laban ke udah jauh, lalu enda bepeda enda ga entu berasai. Agi pan kandang ke cuti, bisi ga aku bulih pangan ke sigi diri semenua empu tang meh tuai setaun ari aku. Nya alai nyau ka ninting lemai ga betemu enggau iya, nyau enggai diri madah kediri rindu keno ko.

“Amai nadai pangan dek kah?” keno ko iya ga nanya aku.
“Kala meda aku mai indu dek ditu” ko aku ga ngaga diri serius.
“Apu..pu..pu..anang Kenya sulu..Iga ga bangat lalu nganu” piak ko iya ga meda aku nyau serius.
Aku dini enda deh, laban ninding diri ke pengindu, nemu-nemu meh belakon enggai ke ditemu orang.

Apai aku udah nurun baru ke menua jauh, tinggal meh kami sida indai aku,ine enggau menyadi aku dua iko. Tudah Ine laban ke enda meda nyau ulih ngiring belama meh ti lebuh kami ke mudik ke ulu Latong. Meri tudah aku meh ngesan giling tilam iya kulu kili ti lebuh ke mindah.


****Pom Tiga 1998

Datai meh maia sekula dibuka baru, nya meh kedianti-anti dalam ati din. Ari keterubah nurun kesekula, sigi maioh amat orang, tambah mega bala apai indai anembiak ke beranjung ke anak sida ke masuk sekula. Aku nadai orang nganjung laban ke udah teleba ba Sekulanya nadai ga nanggur ngerejister nama diri,serta mayar utai ke patut dibayar.

Sepi aku punggung aku asai ke dicubit orang,malik peda aku Lee Ting bediri di belakang aku. Iya ketawa meda aku tekenyit, singin ati ka merap iya tang enda kempang maioh mai ga orang. Lama aku ngenung enda nemu nama utai disebut, siti takut kesaru laban nyau kelalu suah keluar enggau siko nyin sekumbang ke cuti.

“Sapa enggau dek?” ko aku nanya iya.
“Kediri aku, Voon bedau ga datai” ko iya nyaut.
“Pasar tua aram” ko iya mai aku ke pasar, sambil ngaga mua manja.
Aku nama agi deh lemi ga laban ti endang sigi rindu ka begulai enggau iya pengudah ke lama beserara tegal cuti sekula ujung taun.

Kami duai betunda udi ga ke pasar Kanowit, tang meh nangi-ngai gak, takut ke cikgu nangkap. Datai din, ngulu ke iya bebeli ke barang. Iya meh kami duai ba siti supermarket,diak deh aku terpeda ke pangan aku(D) bisi bebeli barang ba kedai nya. Tang iya enda meda aku, ka aku enda masuk kiak udah telabuh ga. Iya ga Lee Ting ari belakang aku, ajih enda meda, ajih enda meda ko aku dalam ati.

“Nama deh Ley?” ko Lee Ting meda aku lubah-lubah.
“Nadai, rindu meda pemanah utai gaga cina” ko aku ga.
Lee Ting enda bejako mina ketawa lalu ngilik kepala. Enda mukai-mukai D.. lalu datai ga ari belakang.

“Nama beli dek Yai” ko iya nanya.
“A..errr..dasuh cikgu meli barang” ko aku nyau serba salah.
“Aku meli barang ke sepiak dulu” ko Lee Ting meda aku agi berandau enggau pangan aku siko. Iya enda nemu D.. pangan aku engka kumbai iya petunggal aku kini meda nya ke indu iban.

“Sapa indu cina nyin?” ko D nanya.
“AA..rrr nyin ko dek.. Ketua kelas kami aku penolong iya, nya diasuh cikgu meli utai kena sekula kami dua iya tadi” ko aku mati-mati ngelalai ke diri ke main kayu enda nemu berapa.
“Au..piak… Ka mupuk ku Mak aku dah nganti ba stesen bas tadi. Bisi ari call ku au” ko D madah…
“Au..legi aku call” ko aku ngicha ke D.. jampat agi ga pulai. Iya meh D.. udah ngelebus senang mimit ga ati aku.

Enda lama udah nya Lee Ting pan datai diak mai bungkus plastic chelum.
“Nama beli dek tadi?” ko aku nanya kena ngelimpang, tang ati din nyau serba salah takut ke iya meda serta nemu.
“Sapa nyin tadi, petunggal dek kah?” ko iya nanya aku.
“Au” ko aku. Aku mai iya tama kedai kopi enda jauh ari alai kami nunggu motor kena ngelayang ke Sedaya.
Maioh ga mata meda kami duai iya bejalai begulai, bisi ka kakang-kakang ga ati din nangi ke ni nemu bala ambai sebelah nya bisi meda tusah amat laban.

Tembu ngirup serta bebeli ke utai bukai kami duai pan mulai ke diri ke sekula.

Taun tu endang taun ti penting laban kami duai Lee Ting sama bela ngambi peresa PMR (Penilaian Menengah Rendah). Beduduk arinya kami duai pan sama bela berajar, suah begulai enggau bala kaban bukai mega.

Lemai Siti…..

Ensepi diri empai ka tinduk, aku pan lalu ga muka buku serta gali lading-lading ba tilam. Jam maianya kira ke pukul sembilan malam, dinga aku nyau capuh orang datai ngagai bilik asrama kami. Munyi orang ke deka belaya, aku lalu angkat deka meda. Enda nemu nya sida pom empat, bisi empat iko ka mai aku berekak.

“Nama dek amat ka dek piak?” ko anembiak siko orang Mapai nanya aku.
Aku agi tebelenga enda nemu nama kebuah sida tumbuh lalu mai aku berekak.
“Nama hal deh? Ukai aku bisi ngachau kita” piak ko tudah aku nyaut iya.

Sekilap mata aja, sepi aku nyau terengkah ga jari iya ba mua aku ngalih ke kiba. Tang asai iya ukai mina jari aja, sigi bisi utai kena iya. Peda aku jari iya bisi megai besi ke digaga iya baka taji-taji, nyau bisi lekat darah. Meda bakanya gama aku ga dagu aku, peda aku tau tak nyau bedarah. Enda liat aku tu tadi lalu aku jamah penapat inat anembiak tu tadi iya engkanya laban udah kesal meda nyau tepansut ke darah aku kini mai nyau bengap-bengap. Nyau tetingkap iya aku tendang, enda lama udahnya sepi aku pun berang aku asai ke disayat. Malik aku peda aku duku candung udah terengkah ba pun berang aku, ukai anchi pengeringat ati aku maianya. Lalu aku sipak anembiak ke mantap aku nya tadi betul-betul ga ngena pala ke ngujung ke iya luput lalat. Bala iya bukai meda utai bakanya nya bekesebar ga lari, aku ambi duku ka kena aku mungga pala seduai ke agi tetingkap diak tang meh nyau ditangkap kaban aku.

Nyau begau bala sida ke pom lima enggau bala kaban aku ke pom empat ngesah kiak, bisi ke duak nya mai ngapir baru. Sekeda sida mai ubat kena ngambi enda pedis, kedua mai ke aku kain kena malut. Pemedis ati enda ulih kira tang meh maioh gab ala kaban nagang enda ngasuh majak belaya.

*** Ari Siti

Dagu aku agi bebalut, datai anembiak siko bepadah ngasuh aku mansang ke opis kepala pengajar. Aku sigi nemu nadai kes bukai, sigi ketegal kes berekak. Nama agi deh nyau meh aku mansang, datai din diak deh aku lalu tama.
Peda aku seduai dua bela belaie mata baka ke baru tembu nyabak, engka disipat cikgu kini.

“Iya nama laya kita tu bangat nyau sampai ka bebunuh Stanley?” ko cikgu disiplin nanya aku, meda aku cegit-cegit bediri tisi mua pintu.

“Enda nemu Cikgu, iya datai lalu mai aku berekak. Enggai nyadi ga aku enda malas, nyau bicai-bicai dagu aku bedarah, udahnya pun berang aku ga dipantap siko tu” ko aku ga nunjuk ke anembiak ari Mapai enggau Ngungun nya tadi. Ati aku tertanya-tanya ni dua iko ke enggau seduai iya kemari deh.

“Malas kami ka ngatur kes belaya ngemalat tub a sekula tu. Nyadi kes kita tu dipanggai ke kami ngagai polis” ko Cikgu dispilin madah.

Apu deh, naka meh pengesal ati. Bakani meh polis enggau aku legi, ukai nya aku ke dulu. Diak deh driver motor ai sekula udah ga nunggu di Jelatung, nganti kami tiga ke nurun endur ngelayang ai batang rajang ke pasar Kanowit.
Sepemanjai ai seduai iya mina duduk nensam aja, aku laban ke agi begedi meda seduai nyau asai ke ka nyangkam seduai berari singin ka muai seduai iya ke ai batang rajang awak ke empa baya ko dalam ati din empa pemedis.

Datai diseberai, motor polis sigi udah sedia nunggu. Orang pan maioh amat ga meda maianya, akai idai naka meh pemalu.

“Masuk…apa tunggu lagi!!!” perak polis laut siko.
Ngumba kediri ko aku bejako dalam ati.

“Kecil-kecil sudah mau tunjuk samseng!!! Siapa pukul siapa??? Hah!!!!” ko polis laut nya tadi nanya enggau kasar lebuh kami ke dalam kereta. Engka iya tepeda ke dagu aku, nya baru iya malik ngagai dua iko nya.

“Saya Tanya!!! Siapa pukul siapa??” ko iya lalu ngaga diri ka mukut anembiak ke ari Mapai nya.
“Sa..saya tuan” ko iya, udah nya polis nya lalu nampar mua iya diak tang enda ga bangat balat.

Datai dib alai, kami diasuh polis muka semua gari enggau barang ba tubuh, mina ngena seluar dalam aja. Apu naka meh pemalu betanchut dalam aja ba dalam jil, udah disoal siasat baru kami diasuh tama ngagai bilik sel bela kediri.

Iya meh kira ngalih ke tengah hari udah aku pulai ari sepital enggau polis, diak deh sida indai aku(Mak), Indai Isac enggau ibu indai Dayang bisi datai ngabas aku.

“Nya..nya meh aku enda ngasuh dek maioh macam” ko indai aku enggau sabak-sabak sinu eda pendiau aku nyau dipasuk ke orang dalam lokap.
“Nadai ngawa nya ibu, iya enda salah. Orang ke dulu ngereja iya, tu kena orang nasat legi engka iya pansut” piak kenu ko polis siko.

Iya meh ngalih ke lemai diak deh polis laut ke mangah tadi nanya aku.
“Kamu ada saudara mara kah yang boleh datang ambil kami sini?” ko iya.
“Ada tuan” ko aku nyaut.
“Bagi saya nombor telepon dia.” Ko iya minta lumor telepon.
“Ini dia tuan” ko aku lalu meri no telepon aki Gasan (apai Micheal).

Kira ke setengah jam meh, diak deh aki pan lalu datai jamin aku pansut ari rumah sel. Kami duai pan lalu mupuk ga mulai kediri ke nanga Machan.
Enda nemu aku tungga maianya, laban ketampak endar ga rita udah masuk kebalai polis. Bisi mensia ke nemu enda meh maioh jako, bisi ke sigi ka bejako nyau nyadi kebuah mulut ga tudah aku.

Kira seminggu udahnya aku pan pulai ke sekula baru, disekula pan berasai malu ga terubah iya laban dagu ke agi betampal-tampal. Tang ka enda pulai laban peresa nyau semak ga agi, enggai ke tinggal enda enggau orang peresa.

Benung aku ti kisuk ngadu ke gari aku diatas katil laban ti baru datai, diak deh Among datai lalau duduk sepiak aku. Iya nyua ke aku sepucuk surat ti disimpan dalam sampul surat warna biru, ari tulis nya aku nemu surat tu sigi datai ari indu ti endang sigi dikerindu ke ati aku maianya. Ari pemaioh indu ti udah ke pangan mina Lee Ting aja ti amat-amat ngasuh aku labuh pengerindu, ngujung ke maioh utai berubah ari segi ulah ba pengdiup aku.
Ba surat iya madah diri irau bendar ke aku,serta madah kediri rindu amat ka begulai enggau aku laban ti lama enda betemu. Diak iya madah kediri deka betemu enggau aku lemai legi, pukul enam lemai keno ko iya.

“Nginsap dek?” ko Among nanya aku lalu nyua ke sebatang insap Winston angat. Aku nyapai insap ke diberi iya lalu nukun ngena macis kayu chap king kong. Nama agi deh, degus-degus meh asap isap baka asap express Lai Lai, nadai nangi ke cikgu laban sigi temu enda ke asrama sida maianya.

Iya meh lemai ari, kira ke semak pukul enam aku pan bejalai nuju kelas sida Lee Ting, laban ti udah dipesan ke iya mai betemu. Datai din peda aku iya endang sigi udah duduk ba meja belakang alai kami duai selalu betemu duduk berandau ngelamatu, aku pan terus nuju iya.

“Lama dah datai?” ko aku nanya serta murus-murut buk iya.
“Baru jak.” Ko iya nyaut tuchum, panchar mata iya madah ke ati diri enda bisi pengarap betemu enggau aku lemainya. Aku pan nyau tepantup ga pengelengau udah betemu enggau indu ti amat-amat dikesayau.
“Bakani asai ati dek ninga aku kena kes empai lama?” ko aku nguji nanya iya.
Iya mina merening aku, tang lalu apin nyaut aku.
“Enda serba salah dek? Enda malu dek begulai enggau aku baru?” ko aku ga ka nemu ati pangan, ni nemu nyau berubah kini laban tudah diri ke udah balat endar ga rita nyau masuk kes polis.
“Ley, mainya aku ninga nuan kena tangkap. Nyau enda nemu agi ku, puas aku nyabak laban ke irau, kasih serta enda sanggup meda dek bakanya. Tang Among madah ngagai aku dek enda salah, puas aku nguji ka ngiga jalai betemu enggau dek tang aku enda nemu cara” ko iya ti landik amat ga jako iban.
Aku tuchum dalam ati, amat sayau meh iya tu enti piak. Gaga ga anak ati laban amat dikesayau ke orang indu. Tang endang sigi perangai Lee Ting nadai kala meda iya ringat, meda iya ngeransi tauka nyida jauh agi jako kasar sekumbang ti bepangan enggau aku. Pementas iya endang sigi aku tabik, jujur dalam semua utai.

Ari berganti minggu, nyau enda lama agi datai ga bulan enam. Tang emh enda mukai-mukai ga lebuh aku ti telepon ke rumah diak deh indai aku(Mak) madah ke ine aku baru udah nadai. Naka meh penusah ati maia nya, ambis utai dikenang pengingat begulai enggau ine. Ari mit aku ke diibun iya, begulai enggau iya nyentuk ke maia iya ngapus ke sebutnya meh. Nama deh pulai meh tudah aku kerumah, ine disengaie ba alai kami nyewa ex-camp budak scout ke dikumbai rumah sewa apai John (Jala).

Datai dirumah bala kaban belayan ari ulu ari ili maioh ga udah datai. Aku pan enggau orang ngadu ke utai ke patut, ngerepik kayu serta utai bukai laban kenadai apai aku(Aba) dirumah, nyau ga tudah aku beambi ke buluh enggau utai bukai ke deka dikena maianya. Tang nasib ga maioh amat bala kaban nulung, tambah mega bala petunggal aku ke lelaki datai magang bela enggau besaup.

Tipa bisi ga Datai maianya, iya datai bisi mai kaban siko umbas iya ga gamar kaban iya nya. Nyau bisi runding kiak ga deh anak ati, enda tau meda utai lawa mimit. Iya meh ari kedua, laban kelelak amat enggau nguan semalam-malam aku pan ninduk kediri enda lama kedalam bilik tinduk. Lebuh aku kegali, diak deh bisi rejat kaki orang tama kiak. Kati ko enda deh, bala temuai sigi mungkang diak ke begari ti udah mandi nya ga ka seiti-itinya aja ga bilik tinduk. Sapa meh nya legi ko ati aku din, peda aku indu ke enggau Tipa nya tadi agi bekain mandi ga tudah tuai ka begari. Aku lalu ngaga diri tinduk, enda kempang ga aku mungkang meda iya, enggai ke dikumbai orang enda mereti,ngambi kesempatan .

Enda nemu nama kebuah ati nyau bisi ga pengerindu ke indu tu, tang meh selalu ga memua ke Lee Ting. Naka enti iya nemu ko ati aku din, sigi dibai iya putus tekalanya empa pengeringat.

Nyau datai maia nganjung, diak deh maioh ga bala bela enggau nganjung niang ine kependam Rabung ari ili rumah orang Nanga Latong. Aku laban kederiba ke sida motor ai ngundan santubong ine tumu pagi meleka ari pendai, nangi ke ninga burong keno ko sida ketuai. Udah tembu semua pengawa tadi diak deh datai maia nanam ulit, lalu diletak sida ulit ine kira ke dua minggu meh. Tembunya tadi bala kaban belayan pan mayuh ga mulai kediri, tang Tipa enggau Indu nya agi bai indai aku(Mak) diak. Ka ga Tipa laban ke endang sigi teleba, kenyau ari mit ke begulai enggau kami sebilik nyau baka menyadi tampung pala. Aku pan nama agi deh, bisi gaga ga dalam ati laban bisi peluang nguntik.

Iya meh lemai kepasar ga kami tiga, bejalai-jalai. Nyau datai maia pulai kesekula, kami tiga bela seretai pulai ke kanowit ngena bas. Iya meh nyau ka datai, aku nyua ke Tipa surat lalu enggau isyarat mata ngasuh iya nyua ngagai kaban iya nya. Iya melintu meda aku tang meh surat udah gab a jari iya, aku takut ke kaban iya nemu maia aku agi diak laban malu kediri udah bisi ati lalu nulis ke iya surat. Irau ga ati takut ke surat diremuk Tipa ngapa, engka iya enda ngasuh kini laban indu nya tuai ari aku. Iya meh datai di kanowit kami tiga pan beserara, aku pulai ke Sedaya seduai ke SMK Kanowit.

Datai disekula agi ga aku berunding ke indu ke enggau Tipanya tadi, Sarina nama iya indu orang Batu Luking. Nitih ke padah Tipa indu nya manah, pandai sekula serta tegas.

Disekula pengawa ke bejual ke insap batang endang sigi business aku, nyau udah meh kena kes majak meh nyadi bayat sekula. Nyau bekotak-kotak insap beli udahnya jual batang ga, keduak nya insap diri empu.
Iya meh lemai betemu ga enggau Lee Ting, laban ke ngambi gari ke udah dibasu tudah. Tuchum ga iya lebuh ti betemu enggau aku, aku nama agi majak nundi iya ga. Megai jari, murus-murus buk sigi pengawa maia ke begulai enggau iya pengawa bukai nya ukai utai dikenang agi cukup meh pengerindu maianya.

Taja pan bisi pangan disekula, tang nerubuk sebelah nya sigi enda kala enda. Ni nya indu ari ngungun, ari Tada, ari Bawan serta enda ulih kingat ke agi. Amat buyu nyangkai ga maia nya, tang meh bepangan maioh agi ke ngambis ke ai liur aja sigi rindu-rindu ati ngaga rekod.

Iya meh datai minggu pulai, aku pan pulai ke Machan. Dalam bas sepemanjai negah rantau jalai endang sigi degus degus meh nginsap, laban maioh bala bakih ke bela sama chap. Nya iya bulih amat, ambis tekul-tekul bala penumpang bukai ensium bai insap.

Iya meh aku sangkai, dia aku bedarat ari simpang sekula ngagai alai rumah sewa kami seretai enggau kaban aku. Iya meh benung nengah rantau jalai, dinga aku orang ngangau ke nama aku. Aku malik peda aku D.. benung bejalai nuju aku, datai diak iya lalu nyua ke aku sepucuk surat.

“Tu surat dek, kirum pangan dek” ko iya, ari mua iya aku nemu iya ringat. Nyau redu-redu, mata iya merah baka ke ka nyabak.
“Sapa nya? Nadai aku tu bisi pangan bukai”ko aku ga, ngaga diri mina bepangan enggau iya aja meh keno ko.
“Enda alah kemula ke dek aku tu, sekelas enggau aku indu tu” ko iya, merak aku.
Kaban aku ke ditisi mina ati diri aja, nyau serba salah ga tudah tuai nya aku ngasuh iya dulu ga enggai ke ninga laya kami duai tu.
“D… anang Kenya, sapa tu nadai aku nemu deh sulu” ko aku ga nguji mujuk. Tang meh nama daya, kaca engka nya udah nyadi sepur iya, asi engka nya udah bari. Enda entu ulih maioh taktik agi, ati orang udah anchor luluh munyi ko lagu Stella Philip.
“Sarina tu, kaban aku empu nemu dek. Tang aku enggai madah ke iya, awak ke aja meh dek ga udah ka ke iya. Enda aku nagang deh, asal aja dek anang ngayah ke iya baka dek ngaga aku” keno ko iya ga, peda aku ai mata iya majak neritaik.
Ujan…ko ati aku. Ukai ga bisi ngayah, mina ke beduan ati aja meh nya wai-wai ko anak ati aku din ga.
Aku nadai jako, mina nganti pemutus ari iya aja.
“Diatu tua nadai nama-nama, laban dek udah bisi iya” ko D.. ga madah ke aku tua iya udah enda bepangan agi.
“Iga nya ngenyampat nya deh…Kati enti aku enda bepangan enggau iya ka dek deh?” ko aku ga ngelasak, makin orang sigi udah pedis ati.
“Ngemeli ke orang dek tu…” ko iya merak lalu nempap belakang aku enggau naka pemalat… Umbas iya ditat ke aku, iya pan lalu berumban-rumban ga bejalai enggai seretai enggau aku agi.

Udah ga lenyau siko, laban tegal ti amu mata. Tang meh datai dirumah surat Sarina lalu aku baca, tusah ati tegal badu enggau D.. agi, tang senang ati tegal ti bulih Sarina nyadi ke ganti. Puas ga ninga lagu ngalai maia nya, Sanggup nyadi ke ganti.

Datai durumah aku sigi nemu apai aku(Aba) sigi udah datai, serta bisi ninga ka mai kami pindah ngagai rumah kami empu ba tanah ke dibeli ke dipansa jalai ke kanowit kira dua kilometer ari pasar Machan. Laban rumah agi benung digaga, tang udah gat au endur pindah taja pan bedau tembu endar.
Datai maia diak deh kami pan lalu pindah, apai aku (Aba) ngerumban laban iya ti deka nurun ke luar negeri baru. Nama agi deh, udah pindah ke rumah baru, apai aku(Aba) lalu meli sti motosikal ngambi ke bisi kena kami beambi ke utai kepasar, laban ti nyampau diri ga 2KM nya ti bedarat. Kadang-kadang kena aku ke Kanowit ga, laban ke agi gauk amat bemotosikal. Kemaia kala bisi motosikal, basikal apin kala bisi. Kadang-kadang lebuh Sarina ke telepon nyau ga aku ngena nya ke Kanowit.

*** Pulai ke cerita disekula enggau pengerindu tadi….
Belabuh arinya, aku pan selalu ga betemu enggau Sarina, bekirum surat.
Lalu maianya aku bisi Lee Ting enggau Sarina, dua-dua bela disayau sama nyadi ke ayam mata. Ti ulih dua-dua bela enda dilengka, sama ka diempu enggau begulai belama.

Peresa pom tiga PMR (Penilaian Menengah Rendah) pan ngelebus serta pemutus pan udah pansut. Manah ga pemutus peresa aku ke sekali tu, enda ngelebu ke ati. Diak deh ujung taun pan datai ga baru, cuti ga baka selama. Lembau ga asai dalam ati tang nama daya iya ga udah datai maya.

***Cuti Ujung Taun Pom Tiga.

Iya meh datai ujung taun Pom tiga, pulai ga aku ke menua. Enda ga entu nyengala sunyi laban ti diau semak pasar, boring-boring dirumah nyau ga aku lepak dipasar. Kadang-kadang mudik ga kulu kemenua kami di ulu Latong nyelam ikan enggau bala kaban. Bisi ga maia di bai indai aku(Mak) kekebun kami di bukit Tibu ngintu lada enggau nyempiang buah.

Ujung minggu kami nyau sampai empat buah ga motosikal nurun ke kanowit lepak, bebala-bala. Duduk ba kedai kopi, ari pagi sampai lemai meda bala “Cikaro” ke ulih kuntik. Diak deh empa penyuah iya, aku betemu lalu belabuh bepangan enggau siko indu asal ari Ranan, M..Y nama iya. Kami duai iya betulis surat, betalipon serta kadang-kadang nya betemu ga dipasar kanowit sekumbang ke cuti. Tang pegaulan jauh kurang ari aku ke enggau Lee Ting enggau Sarina. Pengerindu endang bisi, tang meh engka nya munyi ko laut “enda secocok” ngujung ke kami duai bepangan piak aja.

Sekumbang ke cuti bisi ga aku kala betalipon enggau Lee Ting serta betemu enggau Sarina. Lee Ting madah kediri di Miri enggau madi iya, lalu Sarina di Sibu nganti pemutus peresa pom lima


*** Pom Empat & Lima

Datai maia sekula buka baru, dia deh aku diatur pengajar masuk pom empat sains begulai enggau bala tokoh-tokoh ulat buku (anak Cina). Anang mimpi ka bulih no satu enggau dua, laban enggi orang tu sigi markah 90% keatas aja. Enda beduli ke nya deh, asal ati senang aja nyentuk ke aku pom lima. Maianya pangan aku Sarina udah masuk ngagai pom enam atas di Rosli Dhobby.

Aku enggau Lee Ting nyau jarang begulai, laban iya ti ka numpu ke perhatian ngagai perlajar iya serta maianya bala pengajar nyau makin terit. Maioh amat bala anembiak kena gantung asrama tegal tangkap dating. Sekali sekala bisi ga kami duai iya betemu, tang pengerindu endang sigi bisi berasai berinsur.

“Sampai bila kah tua ka bakatu? “ ko aku nanya Lee Ting lemai ari lebuh maia kami duai iya dating ba ujung kelas.
Iya enda nyaut mina nyandih ke pala iya ba dada aku,jari iya mengkang megai jari kiba aku.
“Berasai lain amai ga diatu, aku arap ka nadai nama-nama ga nyadi antara tua” ko aku nambah baru.
Lee Ting merening mua aku, iya mina tuchum tang meh tuchum iya enda tampak baka dulu suba.

Sekali lebuh maia Valentine days, baka orang bukai mega aku meri gift ngagai iya lemai sebedau masuk kelas. Iya nerima, lalu madah diri sayau ke aku. Aku mina tuchum aja ninga iya madah munyi nya.

Kira ke pukul sembilan udahnya, lebuh aku bejalai nuju kelas kaban aku laban ke deka pulai. Diak deh siko indu, Ani (nama timangan) namaiya minta ulu ke aku bejalai. Aku nanya kini? Iya empai nyaut, sampai kami duai datai ba siti endur petang.

“Ditu tua…Nyambut valentine day’s” ko iya, lalu maut rekung aku serta ka nyium aku. Aku tekenyit, ukai lari ke jagong tang meh enda sangka iya mai bakanya. Aku madah nganu pangan dek enti iya nemu ko aku, aku pan lalu madah enda sanggup bakanya. Baru tadi ke udah meri present ngagai Lee Ting.
“Nama Lee Ting aja ulih meri dek kepuasan piak?” keno ko iya ga enda puas ati. Aku berasai kesal ati, engka baru iya aku gaga indu bakatu, amat berani. Nama agi deh aku pan lalu mulai kediri, enda meh nyadi nyambut valentines enggau Ani tu tadi.

Iya meh ari siti, lebuh aku masuk kelas dia deh kaban indu sama kelas enggau aku lalu bejako nelai aku.
“Nama gaga dek enggau Ani malam tadi? Nama hal Lee Ting nyabak ba asrama kami malam tadi?” ko iya nanya aku.
Aku tekenyit ninga iya munyinya, laban ti enda nemu utai ulu ili.
“Enda nemu nadai nama-nama ga aku enggau iya” ko aku madah.
“Bula dek nya, maioh macam utai tusi iya datai din kemari. Nama bisi Love bite” ba rekong iya deh? Agi ga dek ka menafikan nya?” ko iya nganu aku, laban Lee Ting nya kaban sida mega.
“Apu…sumpah Ju amat nadai aku” ko aku, laban ngasai diri amat nadai.
“Jawap enggau Lee Ting meh” keno ko iya.

Lemai nya Lee Ting bisi datai ngagai kelas aku. Peda aku iya nyua ke gift ke diberi aku kemari pulai baru.
“Aku enda layak ngempu tu. Bisi agi orang ke layak ngempu tu” piak ko iya, sambil mata iya belaie aja ngetat ke diri ka nyabak.
“Nganti dulu, anang bakatu biar aku madah pekara ke bendar” ko aku.
“Sudahlah Ley… Anggap jak kita dua tu kaban aja” ko iya ga madah ke aku.

Bendar aku nguji ka nerang ngagai iya, tang meh laban tegal ati iya ti amat udah pedis amai diak deh nama daya. Pandai amai ga Ani tu ngaga cerita, sampai aku tau beserara enggau Lee Ting laban iya. Engka nya meh penulah aku kini, laban ti suah amat beduan ati pangan-pangan aku ke bukai.

Kira takah dua bulan udah nya, aku lalu apin bisi ganti. Sekali lebuh aku duduk kediri ba luar kelas, aku terpeda ke siko indu ti umbas iya ga ari segi gamal enggau gaya. Indu tu enda entu pejako, burak pemesai kira ke sigi sama saiz enggau aku. Bisi ga ati aku rindu, tang ka ke enda iya ti aku deka ke iya ko ati aku din ga bejako kediri.

Nguji ngapa ga tudah aku, nulis surat. Keterubah enda dibalas enggau surat mina dipesan enggau jako, kedua piak ga iya meh nyau ketiga baru bisi balas ari iya madah diri bisi ga pengerindu ati, tang meh agi rawan laban keno ko orang aku tu maioh ambai lalai. Akai idai, petenah aja nya wai ko aku ga nyalam ke diri sigi amat baya pantai. Nyau kepuas, jinak ga iya udahnya. Nama agi deh lalu besulu meh kami duai iya.

Siko indu ari ngungun, Stina K nama iya biak setaun ari aku. Ari beganti minggu, pengerindu kami duai makin nyadi penyanyau enda ibuh ditusi. Aku lalu bakanya meh endang sigi mengkang maioh collection. Gari endang sigi enda kala masu, laban anjung ngagai iya magang. Tna tu enda jauh enggau perangai Lee Ting, nelap, mentas serta enda mudah ngereda.

Nyau enda berasai apus ga pom lima. Laban ke sigi ngadang diri beserara enggau pangan nama agi deh, nyau tiap-tiap lemai ga begulai enggau iya.
Kadang nya bebala ga kami ke lelaki nurun ngayap pangan diri ba asrama indu. Sekali….

“Sussshh..anang ingar endar arr” ko aku nganu bala ke enggau aku nya tadi.
“Udah nemu pangan kita tadi?” ko Among nanya bala ke biak-biak agi iya ke enggau kami duai kiak.

Aku laban udah madah dulu tadi, nama agi deh lalu ditama ke orag indu meh kami duai Among. Bala bukai bela bekesipa nganti sungai nadai ulu.
Nama agi deh, lalu ngali kediri ga enggau Stina tadi.
“Berani mai dek datai, end atakut ke cikgu dek?” ko Tina nany aku.
“Iya ga anang madah ke cikgu” ko aku ga nyaut.
“Nama dek enggai aku datai piak?” ko aku nyeput kuyu iya.
“Enda ga enggai, tang nangi ke ditemu cikgu” ko Tina nyaut serta nyandih ke pala iya ba lengan aku.
Nyau berandau, betundi semalam-malam, kira pukul empat baru ga berumban-rumban mulai kediri ngagai asrama lelaki. Nyau ka ninting ari ke bakanya, laban enggai muai peluang. Ila ukai nya ulih agi mansang kesekula.

Iya meh datai maia cuti naka meh penyinu ati ngeleka ke sekula ke udah lama alai aku ngelamatu. Kemaioh ngajar aku reti pengidup, kelebih agi reti besulu, bepangan enggau macam agi ko ati din ga.

***Ambis Sekula pom Lima

Taja pan jauh ari pangan diri, Tina semampai telepon ngagai aku belama. Aku pan semampai ngundang iya ke kanowit lebuh maia ujung minggu, laban maia nya aja iya ke bisi ke pasar.

Ari beganti minggu,minggu beganti bulan diak aku nerima berita ari Sarina iya deka nyambung pelajar masuk ngagai university di semenanjung. Pangan aku siko M..Y nyambung pelajar masuk pom enam. Aku mina kapa-kapa empai tetemu ke hala tuju.

Beduduk ari padah bala kaban diak deh aku belajar ba siti Kolej di Miri ngambi ba bidang Technician Computer. Aku laban ke anak rumah panjai, serta enda kala diau dinegeri lain endar asai iya diau dimenua orang. Maioh ga bala ari kanowit enggau besekula diak maya nya, semua kami endang bemalam ba rumah ke disewa orang ke beempu Kolej nya. Diak deh maioh amat ga pengingat ti endang iya cukup ngasuh ati ketawa, sinu serta tergepang.

Alai kami diau iya nya siti rumah betingkat ti tau dikumbai flat. Bala kami kediau diak nyau ka manggai empat puluh iko, pupu menua majoriti iban ti maioh. Iya ga bela udah tuai-tuai magang, nya iya nyadi amat laban enda jauh ari rumah alai orang indu nyewa. Nyau ka ninting malam ga bala ke ngirup, iya ke udah bulih tawing nyau ga dating. Aku laban kemaioh kaki maianya enda sigi diau sebelah night club. Maia ke manah angin sigi pulai badas, maia ke enda nya dulu ga bibat din. Bebukut nyau ukai utai asing agi, bepalu endang sigi nyadi ke rutin. Penyakit gila indu nyau majak kurang, tang penyakit belaya majak balat.

“Akih jai endar jako anak laut nyin tadi, ngumbai kitai iban ngirup botol. Sida aja ke ngirup utai semetik(beer)” ko Donny nusi.
“Ni bagi?” ko aku nanya.
“Ayup nya meh” ko Donny madah ke anak laut ari Sarikei ke bejako bejai utai irup anak iban.
“Alai kangau ke iya” piak ko aku ngasuh Donny ngangau ke iya.
Nyau ga tudah Donny tu tadi ngangau ke iya. Enda lama datai ga tudah Ayup, agi bisi mai giuk engka bisi udah ngirup.
“Apahal ko cari aku ni? Ko nak apa?” ko Ayup ga enda mukai-mukai bejako nyau ngelabong pala. Aku nama agi deh, nyau begirau darah ninga jako iya ti bakanya. Enda bejako tang lalu mukut mua, serta jari aku terengkah, kaki kanan aku pan nyipak perut iya mua ke kanan. Dinga aku nyau demuh tudah tuai, lalu aku tandu baru ga, peda aku nyau pawal pejalai iya madah kediri mati, bebelat bisi iyatiga meter ba tangga. Meda bakanya bala bukai ke benung ngelila lalu bepasung ke aku enda ngasuh agi. Aku laban bai ati agi balat ringat dini enda majak ka nyamah laut nya, bejako nitih ke mulut aja enda mikir ati orang bukai.

Empai bulih sejam udahnya, datai ga anembiak siko ari Marudi kigang-kigang nanya ke sapa ti nyamah lautnya tadi. Meda bakanya lalu aku jengkau besi kira bisi tiga jengkal panjai lalu aku palu enggau nya. Meda utai nyadi tadi diak deh kaban aku ke sama datai ari Machan, Ricky nama iya . Lalu angkat bela besaup enggau aku, dinga aku enembiak nya madah diri parai ka dipambuk enggau TV 40inci.

“Parai aku….eee.parai…anang munuh aku” keno ko iya nyerauh…iya pan lalu melat kediri kebaruh, nyau ambis tinggal selipar iya lari. Begau baru ga bala kami ke sama diau diak laban penyarut nya tadi.

Bakanya meh pengidup diau di Miri, enda lama udahnya aku enggau ibuk aku Mayjory nyewa rumah di Pujut 7 laban ti enda entu nyengala lantang diau maioh bakanya. Arinya tadi sunyi ga aku dirumah alai kami duai nyewa laban ti jauh ari bala kaban. Diak deh aku selalu ga minjau motosikal kaban kena aku kin kitu. Kaban aku nya laban ke anak orang pemisi, iya bisi kereta nya alai iya enda entu ngena motosikal nya.

Maianya udu amat ga ka enggau orang lumba haram. Mai motorsikal nadai nemu belubah, nyau sampai enggau ga dipulas ka nadai ngira utai nganu, tau ngasuh pedis tauka tusah.

Sekali lebu udah ngirup enggau kaban, diak deh aku enggau petunggal aku Igat (Douglas) bejalai enda temu kini penunga. Laban ti sama bela udah palau, laju ga pasang negah highway boulevard. Amat beribut aja asai, anang ke takut ngasuh nyau manjung empa pengaga laban laju. Enda mukai-mukai sepi aku nyau berayun aku keluan, peda aku motosikal dulu agi ari aku. Nya baru aku nemu diri accident, Igat tinggal dibelakang. Nama agi deh aku nyau begiling kaping ba jalai, Igat enda nemu kini penunga.

IYa meh aku angkat peda aku Igat benung ngenat ke ngeli iya, mua iya ambis rajai. Bisi ati aku pedis, bisi ga ka ketawa meda mua Igat nyau baka ke udah dikeramak mayau. Udahnya kami dua pan mulai kediri ke krokop alai sida Igat diau. Agi ga aku ulih mai motosikal, nadai ga apa nama. Nyau tachuh bala din laban ke begau meda kami dua Igat nyau balut darah.

Aku pulai ke Pujut enda lama, ngambi duit. Iya meh baru pansut pintu pagar accident baru ga aku ngelaung ke lobang. Tang nya nadai diasai, patong majak ngeliti tang enda entu berasai pedis. Aku angkat baru lalu meleka ke krokop. Datai din, nampil bala ke benung ngirup baru ga enggau sida. Nyau kepuas diak deh aku ka mulai kediri, tang sida iya nagang aku enda ngasuh pulai laban udah palau. Tang meh jako orang nadai dipeduli, majak ngumbai diri ulih.

Start ke aku motosikal dinga nyau enda nemu tunga aku munyi laban ke digurit. Bedau entu jauh ari endur sida ke diau nya, benung aku belok ba teku jalai diak deh aku lalu labuh ke parit. Nadai utai ngemalat nya, aku nyau enda nemu utai agi bisi 10 minit baru ngeleda sepi, aku nyau basah aja belakang laban ai parit. Nyau bekeradai ga aku mansut kediri ari parit, iya ga motosikal enggai enda ninggang pah aku. Naka meh pemedis iya mayanya, amat nyau bepusin utai dipeda. Rauh-rauh aku minta sah, nadai ga orang ninga laban nyau jauh malam. Semadi bisi bala anembiak ke sama belajar pulai gawa ari pasar bisi meda aku. Sida lalu telepon ngagai bala kaban aku serta mantu aku. Helmet kena aku nya tadi belah dua, nasib enda pala aku pecah ko ati aku din. Naka meh pengesal-ngesal ga maianya, nadai utai udah kala disepi asainya.

Udah meh motosikal diangkat ke bala, peda aku nyau bepusin gamal “handle” mostosikal. Rim iya pan nyau singit, bisi nya patah ga kedua.
Aku mina gilik pala aja meda, nama meh penyadi ko ati din. Tu baru iya ari mati ko dalam ati aku din, diak deh kaban aku mai aku ke sepital. Aku enggai laban takut kediri kena kes accident tegal mabuk. Bendar sida ngumbuk,aku madah kediri enda pedis aja. Padahal dini ka enda pedis, ambis ngeliti pala patung enggau belakang. Dini enda deh, nyau tiga kali accident semalam amat bedau kala-kala.

Bersambung*****

Deka disambung baru nganti ke udah bisi Idea. Serta cerpen tu agi ka diseruri baru sebedau dicetak nyadi buku. Bisi komen tau tulis ba ruangan komen aku.

Anembiak Latong Rebak Baru @ Stanley Methew Dana